Hafterî adirbirnayîşê tirk-rûsî red kerd

Mareşal Halîfe Hafter o ke rojhelatê Lîbya de serdest o vengdayîşê Rûsya û Tirkîya yê seba adirbirnayîşî red kerd.

Vervatoxê Mareşal Halîfe Hafterîyî Ahmed El Mesmarîyî bi eşkerayîyêka nuştekîye pare kerd ke operasyonê înan ê leşkerî yê vera hêzanê Hukmatê Yewîya Neteweyîye yê Trablusî do dewam bikerê.

Mesmarî ard ziwan ke aramîya sîyasî têna wexto ke ''komê terorîstan yenê îmhakerdene'', mîlîsê ke hetê paytextî ra yenê kontrolkerdene bêrê batalkerdene û bêçekkerdiş bêro meydan munkîn a.

Hêzê Hafterî menga nîsana 2019î ra nata seba kontrolkerdişê Trablusî operasyon kenê. Destpêkê hewteyî de şaristanê Sîrte yê rojhelatê Trablusî yo ke cayêko stratejîk o kewtbi destê hêzanê Haferî.


Serekkomarê Tirkî Recep Tayyîp Erdogan û Serekdewleta Rûsya Vlademîr Putînî roja çarşemeyî pêvînayîşê Îstanbulî de seba adirbirnayîşê Lîbya vengdayîş kerdbi. Menfaatê Moskova û Anqara yê Lîbya pênêkenê.

Moskova, Misir,  Emîrîyê Ereban û Fransa paştî danê Hafterî, Tirkîya zî bi hawayêkê eşkera paştî dana komanê Îslamî yê ke merkezê înan Trablus de yo.