Îsraîlî serê sibayî ancî Beyrûd da bombayan ver. Hêrişê vizêrînî de hîrê endamê Cepheyê Xelisnayîşê Şarî yê Filîstînî (ERGF) kişîyayî. Hêrişêkê bînî zî de berpirsîyarêkê Hamasî yê Lubnanî kişîya.
Goreyê medyaya Lubnanî taxanê başûrê Beyrûdî de serê sibayî hêrişêko bîn ame kerdene.
Goreyê rojnameyê L'Orient le Jourî Îsraîlî wesayîtêk da bombayan ver. La nêzanîyeno ke hêriş de zerarêk resayo çewî ser yan ney.
Goreyê doneyanê Wezîrîya Weşîye ya Lubnanî roja yewşemeyî hêrişanê Îsraîlî de Lûbnan de tewr tay 105 kesan dinyaya xo bedilnaya.
Bombardumanê Îsraîlî şewe zî dewam kerd.
Herêma Kola ya Beyrûdî de Îsraîlî apartmanêk da bombayan ber. Hêriş de hîrêyê ci endamê ERGFyî çar kesî kişîyayî.
Goreyê çapemenîya Hamasî hêrişêkê vera kampa filîstînijan a Lûbnanî de berpirsîyarê Hamasî yê Lubnanî Fatîh Şarîf Ebû el Amîn cinî û domananê xo reyde kişîya.
Destpêkê şerê Gazze ra nata Îsraîlî reya verêne hêrişê kampêka filîstînijan a Lubnanî kerd.
Hetê bînî ra Senatorê Amerîka Mark Kellyî yewşemeyî kanala NBCyî rê qisey kerd û dîyar kerd ke Serekê Hîzbullah Hasan Nasrallah bi bombaya Amerîka kişîyayo.
