Îran û Rojhelatê Kurdîstanî de xoverdayîşo ke qetilkerdişê Jîna Emînî ra dima dest pêkerdbî roja 50. de zî dewam kerd.

Rojhelatê Kurdîstanî de şaristananê Sine, Merîwan, Bokan, Seqiz, Îlam, Mahabad û ê bînan de ciwanan rayîrî qefilnayî. Şino de ciwanêko ke amebi qetilkerdene roja 40. ya şînî de ame yadkerdene. Kirmaşan de cinîyan bi sloganê 'jin, jiyan, azadî' rayraşîyayîşêk kerd.

Tay camîyanê Rojhelatê Kurdîstanî de wextê nimajê îneyî de malayan derheqê protestoyan de hişyarîyî dayî. Şaristanê Sine de mala Îbrahîm Kerîm nimajê îneyî ra dima deyîra 'Ey Şehîd'î vate.

Sistan, Belûcistan, Zahîdan, Xaş, Rask, Serawan, Serbaz û Wêranşarî de bi seyan kesan nimajê îneyî ra dima çalakîyê rayraşîyayîşî kerdî.

Şaristanê Xaşî yê Belûcîstanî de nimajê îneyî ra dima şar bi sloganan ver bi bînaya walîtîye şi. Hêzanê dewleta Îranî şar da guleyan ver. Rêxistina Heqanê Merdiman a Îranî da zanayene ke şaristanê Xaşî de rejîmê Îranî hêrişê şarî kerd û tewr tay 16 kesî qetil kerdî. Şarî rixmê hêrişî zî kuçeyî nêteriknayî.

Înîsîyatîfê Aktîvîstanê Belûçan da zanayene ke nasnameyê 9 kesan ameyê dîyarkerdene. Çalakîkeran zî pare kerd ke hêrişî ra dima nêweşxaneyî debîyê û rewşa xeylêk çalakîkeran giran a, seba ke xizmet nêdîyeno birîndaran beno ke hûmara merdeyan bizêdîya. Belûcîstan de zî çalakîkeran xeylêk rayîrî qefilnayî.

Zahîdan de nimajê îneyî de veng dîya ke wa referandum bêro kerdene û wina ame vatene: ''Şarê Îranî îdareyî ra qayîl nîyo. Selahîyetdarê hukmatî ganî goş bidê vengê hemwelatîyan. Qet yew rayîrê înan nêmendo, wa dewlete waştişanê şarî bîyara ca. Wa bi beşdarîya çimdaranê mîyanneteweyîyan referandum bêro kerdene û netîceyanê ci rê hûrmet bêro mojnayene.''

Tehran de bi taybetî herêmanê Cewadye û Îkbatanî de çalakîkeran reyna kuçeyî kerdî de. Esfehan de hêzanê dewlete hêrişê merasîmanê yadkerdişî kerd. Şaristanê Luhijcanî de şarî seba kesanê ke ameyê qetilkerdene findî vistî ta û sloganî eştî.

Rêxistinanê Heqanê MErdiman a Îranî pare kerd ke heta nika çalakîyan de 304 kesî ameyî qetilkerdene ke nînan ra serrîya 41 tenan 18 ra qijêr a.