24ê gulana 2024î de qezaya Licê ya Amedî de welatperwer Mehmet Yildirim hetê leşkeranê tirkan ra amebi qetilkerdene. Merkezê Îrtîbatî û Çapemenîye yê HPGyî derheqê babete de eşkerayîyêke daye.

Eşkerayîye wina ya:

''Têkoşînê Mayanê Şemeyî kewto hewteyê hezarinî. Aqîbetê bi hezaran şehîdanê Kurdîstanî ewro zî dîyar nîyê ke rixmo ke nînan rê 'faîlî meçhûl ê' vajîyenê faîlê şehîdan dewlete bi xo ya. Ma têkoşînê pêro keye û dadîyan selam kenê.

Heyf ke dewleta tirke ya qirkere vera şarê kurdî yê bêguneyî ewro zî kerdişanê xo yê xiraban rê dewam kena. 24ê gulana 2024î de qezaya Licê ya Amedî de Nenyas de welatperwero ercîyaye Mehmet Yildirim hetê dewleta tirke ra keyeyê xo de û verê çimanê ferdanê keyeyî de bi hawayêkê barbarî ame qetilkerdene. Dişmena kurdan dewleta tirke ya faşîste verê cû zî 3yê hezîrana 1994î de keyeyê Yildirimî ra Adnan Yildirim Savaş Buldan û Haci Karayî reyde remnabi û qetil kerdbi. Dezayê Mehmet Yildirimî Medenî Yildirimo 18 serre zî 28ê hezîrana 2013î de wextê protestoyî de hetê leşkeranê tirkan ra amebi qetilkerdene.

Embaz Mehmet Yildirim 2008 de tepişîyabi, hîrê serran zîndanan de mend la qetî tewirê xo yê welatperwerîye ra fek vera nêda. Ey teyna armanc kerdêne ke erdê xo de, dewa xo de, keye û nasnameyê xo reyde bi hawayêkê rûmetênî biciwîyo. La dewleta tirke no ferdê keyeyê Yildirimî zî bi hawayêkê barbarî qetil kerd. Nê serebûtî zî mojna ke kurdê ke cuya rûmetêne de israr kenê hedefê dewlete de yê. Mehmet Yildirim sey nimûneyê welatperwerîye qetî teslîmê dişmenî nêbi, ey seba pawitişê rûmetê welatperwerîye xo ver da û şehîd bi. No tewirê ey o ercîyaye qehremanîyêka rûmetên a. Çunke o seba ke ancî nêbo esîrê dişmenê qirkerî şehîd bi.

Ma şexsê embaz Mehmetî de şehîdanê keyeyê Yildirimî û pêro şehîdanê ke faîlê înan eşkera yê, bi rêz û minetî yad kenê. Ma soz danê ke seba ke bibê layîqê nê tewirê welatperwerîye hîna zaf têkoşîn bikerê û qesasê şehîdan bigêrê. Nê esasî ser o ma keyeyê Yildirimî yê ercîyayeyî rê û pêro şarê Licê yê welatperwerî rê serweşîye wazenê.''

Çalakîyê gerîlayan

HPGyî heman eşkerayîya xo de derheqê çalakîyanê gerîlayan û hêrişanê artêşa îşxalkere de nê agahîyî dayî:

''Herêma Şehîd Delîlî ya Rojawanê Zapî

-24ê gulane de Warê Xoverdayîşî yê Girê FMyî de kepçeyêke ameye derbkerdene û xebata ci ameye vindarnayene.

-24ê gulane de Warê Xoverdayîşî yê Girê Amedîyê de îşxalkerî ameyî pirodayene.

-26ê gulane de Warê Xoverdayîşî yê Girê Amedîyê de kepçeyêke ameye îmhakerdene.

-26ê gulane de Warê Xoverdayîşî yê Girê Amedîyê de 1 mewzî ameye derbkerdene.

-26ê gulane de Warê Xoverdayîşî yê Girê Cûdîyî de gerîlayanê YJA-Starî da îşxalkeran ro û îşxalkerêk ceza kerd.

Herêma Metîna

-25ê gulane de Warê Xoverdayîşî yê Golka de îşxalkerî ameyî pirodayene.

-25ê gulane û 27ê gulane de helîkopterê ke Warê Xoverdayîşî yê Golka û Dergelê dayêne bombayan ver hêzanê ma mudaxeleyê ci kerd.

-26ê gulane de Warê Xoverdayîşî yê Golka de îşxalkerî ameyî pirodayene û xebata kepçeyêke ameye vindarnayene.

Hêrişê artêşa îşxalkere

-24, 25 û 26ê gulane de tunelê Warê Xoverdayîşî yê Girê FMyî 53 reyî bi gazanê kîmyewîyan û çar reyî bi teqaberanê qedexeyan dîyayî bombayan ver.

-24 û 25ê gulane de tunelê Warê Xoverdayîşî yê Girê Cûdîyî 8 reyî bi dronanê teqaberan dîyayî bombayan ver.

-25ê gulane de tunelê Warê Xoverdayîşî yê Girê Amedîyê 2 reyî bi gazanê kîmyewîyan dîyayî bombayan ver.

-25 û 26ê gulane de warê Kolît, Sinînê, Xinêrêya Jorî yê Xakurkê; warê Dergelê, Şêlazê, Bazê yê Metîna; Warê Xoverdayîşî yê Girê Biharî yê Zapî; warê Deşta Kafya û Zevkê yê Garê bi teyarayanê şerî dîyayî bombayan ver.

-24, 25 û 26ê gulane de warê Golka û Dergelê yê Metîna bi helîkopteran dîyayî bombayan ver.''