Iraq de nawnayîşê ke 1ê teşrîna verêne de vera hukmatî dest pêkerd dewam kenê. Goreyê tay çimeyan, nawnayîşanê vera hukmatî de heta nika 545 kesî merdî û 24 hezar kesî birîndar bîyî. Goreyê tay çimeyan zî 600 ra zêdêr kesî merdî û hûmara birîndaran zî resaya 30 hezarî.

Goreyê Komîsyonê Heqanê Merdiman ê Iraqî nawnayîşanê vera humatî de 545 kesî merdî ke 17ê înan wezîfedarê asayîşî bîyî.

Eşkerayîye de ame vatene ke roja destpêkerdişê nawnayîşan ra nata 24 hezar kesî birîndar bîyî. 1ê teşrîna verêna 2019î de wextê destpêkerdişê nawnayîşan de 2 hezar û 800 kesî ameyî tepiştene. 38ê înan tede nîyê, pêro kesî ameyî veradayene. Yeno vatene ke 38 kesê tepişteyî seba ke tewrê serebûtanê kiştişî ra yenê sucdarkerdene. Aqîbetê 79 kesanê ke ameyî remnayene nêno zanayene.

Tewirê Sadrî yê Krîzê Hukmatî de

Waştişê nawnayîşkeran ra dima Serekwezîr Adil Abdulmehdîyî zî serekwezîrîye ra îstîfa kerd. Serekkomarê Iraqî Berhem Salîhî seba hukmatî sûnî, şîa û kurdan reyde pêvînayîşî kerdî. Labelê pêvînayîşan de nêtîceyêke nêgirewte û naye ra zî destpêkê menga sibate de zî Muhammed Tewfîk Allawî seba awankerdişê hukmatî wezîfedar kerd. Sere de lîderê Têgêrayîşê Sadrî lîderê Şîayî Muqteda El Sadrî hêz û paştî da Allawîyî. Di hewteyan ra dima Sadrî Allawî rê gef wend û vat: ''Eke mabênê hukmatî de wezîfeyê wezîrîye teslîmê endamêkê partîyêke bêro kerdene ma hîrê rojan de do hukmat birijnê.'' Sadrî eşkera kerd ke o wazeno Iraq de hukmatêkê teknokratî bêro awankerdene. Naye ra wazeno ke mabênê hukmatî de endamê partîyî nêbê.

PDKyî hukmatê dûrî yê partîyan red kerd

PDKyî zî derheqê awankerdişê hukmatê neweyî de eşkeraîyêke daye. Sekreterê Polîtburoyê PDKyî Fazil Mîranî derheqê babete de eşkerayîye de vat: ''Kes nêeşkeno herinda kurdan de bire bido.''

Mîranîyî ard ziwan ke ê derheqê awankerdişê hukmatê neweyî de bi çimanê PDKyî ney bi çimanê kurdan ewnîyenî mesele.

Mîranîyî da zanayene ke heyetêkê partîyanê Kurdîstanî do şoro Bexdad û partîyanê sûnî û şîayan reyde pêvînayîşan bikero.

Mîranî vat: ''Têna ma eşkenê nameyan eşkera bikerê û vajê ke nê kesî wezîrê ma yê.''

Allawî: Sîstemê Iraqî do birejo!

Allawîyo ke seba awankerdişê hukmatî pêvînayîşan keno ard ziwan ke eke hukmato ke ey do awan bikero birejo pêro sîstemê Iraqî zî do birejo.

Goreyê xeberanê medyaya Iraqî sîyasetmedarê xoserî Muhammed Allawîyî vat: ''Eke hukmato ke do bêro awankerdene birejo, sîstemê sîyasî yo ke serra 2003î ra dima Iraq de awan bi, do bi temamî birejo.''

Allawîyî ganî tewr erey heta destpêkê menga adare lîsteya heyetê wezîran a hukmatî pêşkêşê raydayîşê hukmatî bikero.