Hêzanê bingeyînan ê sîyasî yê Iraqî pêkerd ke îqtîdaro nikayên bêro pawitene. Çalakîyanê şermezarkerdişî de roja şemeyî 7 kesî ameyî kiştene. Paytext Bexdad bi sey meydanê şerî.

Dormeyê meydanê Tehrîrî yê paytext Bexdadî de 3 kesî pê fîşekî û kesêk zî pê bombaya gazî merdî. Heman roje de 3 çalakîkerî zî şaristanê Basra de bi fîşekan ameyî kiştene. Hêzanê dewlete pare kerd ke Basra de kam beno wa bibo oyo ke bivejîyo teberî do bêro destbendkerdene. Hêzanê bingeyînan ê sîyasî yê Iraqî îstîfayê Serekwezîr Adil Abdulmehdîyî taloq kerdibi. Na reye zî seba pawitişê îqtîdarî pêkerd. Muqteda Sadro ke rayberê Şîa yo û terefgîrê çalakîkeran bi zî tede yo. Yeno vatene ke Sadrî tedaya Îranî û îtîfaqanê Bexdadî ra serkewte birra xo vurnaye. Zaf kombîyayîşan ra pey hêzanê sîyasî  reformê ke waştişanê çalakîkeran ra dûrî yê ser o pêkerd. Çalakîkerî Qanûnê Bingeyî yo newe teleb kenê la hêzanê sîyasî birre daye ke bi tedayan çalakîyan biqedînê. Gore AFPyî hêzanê sîyasî pêkerd ke Serekwezîr Adil Abdulmehdî îqtîdarî de bimano û bi tedayan çalakîyan vindarnê. Gore hesabanê AFPyî 1ê teşrîna peyêne ra heta nika 300 kesê ke zafê înan nawnayîşkerî bîyî, ameyî kiştene û 12 hezar kesî zî birîndar bîyî.