Iraqî de bîlançoyê roja pancşemeyî zaf giran bi. Zafînê kiştişê başûrê welatî de bîyî ke nawnayîşkeran nê cayan de bînayê hukmatî hedef kerdêne.

Nawnayîşan Bexdad, Necef, Kerbela, Basra, Zîkkar, Mussena, Mîssan, Nasirîye û Dîwanîye de vizêr zî dewam kerd. Nawnayîşkerî wazenê ke îdareyê Iraqî bêro vurnayene. Heta nika 390 ra zêder kesî nawnayîşan de merdî û 16 hezar kesî zî birîndar bîyî.

Dima ke çarşeme Konsolosxaneyê Îranî yê Necefî ame vêşnayene, roja pancşemeyî zî nawnayîşan dewam kerd. Hêzê Iraqî bi hawayêkê bişîdetî hêrişê nawnayîşkeran kenê. Zaf şaristanan de vera nawnayîşkeran guleyê rastikênî yenê xebitnayene. Şaristanê Nasirîye yê eylatê Zîkarî de zî gore doneyanê fermîyan 25 nawnayîşkerî roja pancşemeyî merdî. Gore tay çimeyan tewr tay 323 kesî merdî û 250 kesî zî birîndar bîyî.

Generalêk Wezîfeyê Xo ra Ame Dûrvistene, Walîyî Îstîfa Kerd

General Celîl Eş-Şammarî seba ke fermanê xebitnayîşê şîdetî da wezîfeyî ra ame dûrvistene û Walî Zîkarî Adil Dehuylî zî bi beyanatêkê nuştekî pare kerd ke eke rewşa wîlayetî wina dewam bikera do îstîfa biko. Duheylîyî vizêr da zanayenene ke general wezîfe ra do bêro dûrvistene. Wextêkî ra pey Duheylîyî beyanatêko newe weşana û pare kerd ke ey îstîfa kerd. Duheylîyî  îstîfayê xo de vat: "Walîyo ke nêeşkeno şaristan bipawo ganî îstîfa biko. Fermanê xebitnayîşê şîdetî hetê mi ra nêame dayene."  Rêxistina Efûyî pare kerd ke Nasirîye de rewşêka şerî esta û venga komelê mîyanneteweyî da ke nê banyoyê gonîye vindarno.

Necefî de Tewr Tay 3 Nawnayîşkerî Ameyî Kiştene

Roja Panşemeyî şaristanê fîraz ê Şîayan Necefî de zî nawnawîşî estbî. Herçiqas dima ke Konsolosxaneyê Îranî ame veşnayene qedexeyê vejîyayîşê teberî ame îlankerdene nawnayîşan dewam kerd. Hêzanê Dewleta Iraqî Necefî de 3 nawnayîşkerî kiştî û 7 zî birîndar bîyî. Bexdadî de gore komîsyona heqanê merdiman a hukmatî nawnayîşkerî merdî. Şaristanê fîraz ê bînî yê Şîayan Kerbela de zî mabênê hêzanê dewlete û çalakîkeran de şer qewimîya. Şerî de zaf kesî birîndar bîyî.