Dima ke artêşa Azerbaycanî bi paştdayîşê dewleta tirke vera Karabagê Corî operasyon kerd şer mabênê Armenîstan û Azerbaycanî de şer dest pêkerd. Rixmê vengdayîşan zî şer dewam keno, adirbirnayîş nêno kerdene.

Şewe zî bombardumanan û şerî dewam kerd. Paytextê Komara Karabagê Corî  Stepanakert binê tarîye de mend. Yewşeme Azerbaycanî bi droneyan paytextî ser o bombayî varnaybî.

Artêşa Azerbaycanî îdîa kena ke xeylêk mewzîyê Armenîstanî vistî destî. Na herême 30 serran ra nata destê armenîyan de bîye. Serranê 1990an de dima ke Karabagî xoserîya xo îlan kerde şer de 30 hezar kesî merdbî.

Wezaretê Pawitişî yê Azerbaycanî da zanayene ke înan hêzanê armenîyan ser o bombayî varnayî. 

Artêşa Karabagê Corî zî da eşnawitene ke înan nêverda ke yewînê Azerbaycanî înan ser o kom bibê û 'rewşa taktîkî vurîyaye.'

Wird terefî zî vanê ke zerarêko pîl dayo yewbînan. Goreyê eşkerayîyan bi hezaran leşkerî kişîyayî.

Serekkomarê Fransa Macron û Serekdewletê Rûsya Putinî telefon de qisey kerd û waşt ke adirbirnayîş bêro îlankerdene. Putinî waşt ke çarşeme wezîrê karanê teberî yê Azerbaycan, Armenîstan û Rûsya kom bibê û pêbikerê. La heman roje Serekkomarê Azerbaycanî Îlham Alîyev û Serekwezîrê Armenîstanî Nikol Paşiniyanî reyna seba seferberîye veng da.

Têna Tirkîya seba adirbirnayîşî veng nêda. Tirkîya vana wa Karabago Cor bêro îşxalkerdene. Goreyê selahîyetdaranê Karabagî Tirkîya rasta rast mîyanê şerî de ya.

Moskova zî vera Anqara nêrazîbîyayîşê xo mojna û vat: ''Tirkîya adir erzena benzînî ser.'' Moskova vat: ''Tirkîya leşkerê bipereyî Lûbnan û Sûrîye ra erşawitî Karabagê Corî. Ma pê rewşe qerqilîyenê.''