Paytextê Kolombîya Bogota de konferansê bi sernameyê ''Heta Înşakerdişê Komelê Demokratîkî Serewedaritişê Vera Kapitalîzmî'' ame kerdene. Çarçewa paradîgmaya 'Neteweya Demokratîke û Konfederalîzmê Demokratîkî' yê Rayberê Şarê Kurdî Abdullah Ocalanî de konferans de nîqaşî ameyî kerdene.

Konferans de şar û organîzasyonanê cîyayan hîrê rojan tecrubeyê xo pare kerdî û ard ziwan ke sebba dinyayêka newîye ganî têkoşînêko hempar bêro kerdene.

15 welatan ra 50 organîzasyonî tewrê konferansî bîyî. Metnê hemparî yê konferansî de ame parekerdene ke sayê yewî û paştdayîşê şaran ra kapîtalîzm, nîjadperestî, pederşahîye û kolonyalîzm do bêrê binvistene.

Eşkerayîya metnê hemparî de veng dîya ke ganî bi pêameyîşî tecrubeyî bêrê parekerdene û wina ame vatene: ''Ma veng danê ke bi hawayêkê kolektîfî biewnê xo ra, hîkaye, zerrî û têkoşînê xo yew bikerê.''

Metnê hemparî de seba awankerdişê komelê demokratîkî û azadî zî wina veng dîya: ''Sere de seba azadîya Abdullah Ocalanî, seba azadîya pêro tepişteyanê sîyasîyan ê Kurdîstanî, Ablayala û dinya ma têkoşîn bikerê.''