Krîzê Lîbya beno xorin, Yewîya Ereban do kom biba

Seba ke Tirkîya leşkeran bierşawa Lîbya zaf welatan vera naye nêrazîbîyayîşê xo mojna. Waştişê Misirî ser o Yewîya Ereban do kom biba.

Yewîya Ereban eşkerayîyêk daye û pare kerd ke dima ke Tirkîya bire daye ke do leşkeran bierşawa Lîbya, Misirî seba kombîyayîşî vengdayîşêk kerd. Ame eşkerakerdene ke roja sêşemeyî do bêrê pêser.

Dima ke serra 2011î de Muammer Kaddafî hetê NATO ra amebi çinkerdene, Lîbya de kaosêko pîl ame meydan. Rojawanê Lîbya Trablus de komê îslamî yê Birayanê Misilmanan serdest ê û rojhelatê ci de zî general Halîfe Haftar serdest o. Dewleta tirke û Katar paştî danê Hukmatê Trablusî. Misir, Yewîya Ereban, Fransa û Rûsya zî paştî danê îdareyê general Halîfe Haffarî yê Tobrukî. Hêzê Halîfe Haftarî xîret kenê ke Trablus bivisnê destî. Tirkîya zî ambargoyê erşawitişê çekan o ke bira NATO yî ya binpay kena û çekan erşawena uca.Tirkîya menga teşrîna peyêne de hukmatê Trablusî reyde peymanêke kerde. Armancê peymane no yo ke hemkarîya leşkerî zêde biko û sînorê dengizî eşkera biko.

Temsîlkarê Lîbya yê Neteweyanê Yewbîyayeyan Nêrazîbîyayîşê Xo Mojna

Temsîlkarê Lîbya yê Neteweyanê Yewbîyayeyan Hasan Salameyî zî vera peymane nêrazîbîyayîşê co mojna. Salameyî rojnameyê Le Monde yê Fransa reyde qisey kerd û vat ke peymana dengizî verê azalozîya mabênê Tirkîya û Yewnanîstanî akena. Kibris û Misirî zî vera peymane nêrazîbîyayîşêko xurt mojna.

Dewleta Tirke Tewr Tay 500 Cergî Erşawitî

Yeno vatene ke hêzanê Tirkîya bi seyan cergê DAÎŞî û El Nusra yê Sûrîye erşawitê Lîbya. Keyeyê Muşahede yê Heqanê Merdiman ê Sûrîye da zanayene ke Tirkîya tewr tay 500 ''şerwanê Sûrîye'' erşawitî Lîbya û Tirkîya kampêk awan kerde ke na kampe de tewr tay 1000 kesî estê. Yeno  vatene ke Tirkîya Efrîn de seba şîyayîşê Lîbya merdiman qeyd kena û goreyê peymananê seba 3 û 6 mengan 2000-2500 dolar dana.