Gazze de şerê 3 rojan ra dima mabênê Îsraîl û koma çekdare ya Fîlîstînî Cîhadê Îslamîyî de adirbirnayîşêk ame îlankerdene. Adirbirnayîş şewa yewşemeyî kewt dewre.

Heta hela peyêne ya destpêkê adirbirnayîşî artêşa Îsraîlî bombardumanê vera cepheyanê Cîhadê Îslamîyî dewam kerd.

Artêşa Îsraîlî 'hêrişê bi roketan' ê ke Gazze ra ameyê kerdene, xo rê krdî bahaneya hêrişanê hewayî.

Buroyê Serekwezîr Yair Lapidî sereraşt kerd ke adirbirnayîş şewe saete 23.30 de dest pêkerdo. Hukmatê Lapidî vat: ''Heqê ma est o ke ma bi tûjî cewab bidê binpaykerdişê adirbirnayîşî.''

Cîhadê Îslamîyî zî da zanayene ke hêrişê muxtemelî de ê do heqê xo yê cewabî bişuxilnê.

Goreyê Wezîrîya Weşîye hêrişanê hewayî yê Îsraîlî de Gazze de herêma binê kontrolê Hamasî de 9ê ci domanî 17 filîstînijî ameyî kiştene.

Roja îneyî ra heta vizêr şewe Îsraîlî 15ê ci domanî 44 filîstinijî qetil kerdî, 360 filîstînijî birîndar kerdî ke fermandaranê Cîhadê Îslamîyî ra Taysîr El Cebarî û Xalid Mansûr zî nê hêrişan de kişîyayî.

Dîya zanayene ke Îsraîlî 40 endamê Cîhadê Îslamîyî de Şerîaya Rojawanî de destbend kerdê.

Gulana 2011 de zî şerê 11 rojan ê mabênê Hamas û Îsraîlî de 260 filîstînijî û 14 îsraîlijî ameybî kiştene.