Halîs Îkîncîsoyo ke serranê 1980an ra nata Swêd de ciwîyeno ard ziwan ke awanîyêka sey gladio dostê kurdan Olof Palme kişto û seba ke  sûc berzê milê kurdan zaf çîyî kerdî. Îkîncîsoyî pare kerd ke seba ke Palmeyî paştî dayêne welatanê sey Vietnam, Filîstîn, Angola ûsn. emperyalîstî tira ecîz bîyî û pê zor û komployê NATOyî PKK sey terorîst ame îlankerdene û dima Pame ame kiştene, sûc zî erzîya milê PKK û kurdan. Bi nê hawayî kiştoxê raştikênî ameyî nimnayene.

Îkîncîsoyî vat: ''Wexto ke Palme kişîya medyaya Swedî PKK û kurdî kerdî sûcdar. Mîkrofonî hetê Polîsanê Asayîşê Swêdî (Sapo) ra keyeyê ma de ameybî cakerdene. Dima wexto ke her çi eşkera bi Sapo neçare mend ke nînan qebul bikero. 9 serrî nînan ma goştaritî. Wexto ke no vejîya werte sena Partîya Karkeran a Demokratan bi skandal. Destûrê ma yê roniştişî û pasaportê ma ameyî batalkerdene. Dima zî Palma ame kiştene û sûc erzîya milê kurdan. Medyaya Swedî kurdî û PKK sey terorîst pênase kerdêne. PKK ame hedefkerene. Goreyê mi NATOyî no wezîfeyê pasîfkerdişê PKKyî da nînan. Sapoyî xîret kerdêne ke embazê ma bibê ajan. Ma tam 9 serran hewte de 3 rojan şîyêne qereqol. Polîsan ma tepiştêne, teda kerdêne, şîdeto psîkolojîk kerdêne. Bêsebeb tim dormeyê keyeyê ma ameyêne girewtene. ''

Îkîncîsoyî ard ziwan ke kurdanê Swêdî kişîyayîşê Palmeyî reyde trajedîyêka pîle dîye û vat: ''Eke Swêdî Têgêrayîşê Azadîye yê Kurdîstanî û kurdî terorîzê nêkerdêne nika dinya de rewşa kurdan do cîya bîyêne. 34 serrî yo ke dejê Palmeyî ancena. Heta 3-4 serrî verê cû polîsî reyna eştbi keye û kargehanê ma ser. Ez seba xo dewleta Swêdî ra çîyêk nêwazena. Waştişê mi têna no yo ke Swêd wa kurdan ra uzrê xo biwazo û PKK lîsteya terorî ra bivejo. Wa şaşîtîya xo raşt bikero.''