Doktoranê Sînornenasan (MSF) bi eşkerayîyêke da zanayene ke tîma înan a rewşa lezabeze Girawa Mîdîllî ya Yunanîstanî de 22 koçberî dîyê ke nînan ra destê 3 tenan girêdaye bîyê û 4 kesî zî birîndar bîyê.

Koordînastorê MSFyî yê Mîdîllî Teo di Piazza wina qala serebûtî kerde: ''Ma îxbarêkî ser o xo resna uca û wexto ke ma nêzdîyê Mîdîllî bîyî vengê qîrayîşan eşnawit. Ma 22 kesî dîyî. Destê hîrê kesan girêdaye bîyî û çar kesê bînî zî birîndar bîyî. Goreyê vatişanê înan komêke da înan ro. Seba ke şoq bîyê ma nê merdimî mudaxeleyê verênî ra dima sewqê psîkologan bikerê. Goreyê famkerdişê ma hewt yan zî heşt kesan vato ke ê doktor ê û nêzdîyê înan bîyê. Dima nê kesan da nê koçberan ro û destê înan girê dayo.''

Hukmatê Yunanîstanî heta nika derheqê babete de eşkerayîyêke nêdaye.

MSFyî venga selahîyetdaranê yunanan da ke vera serebûtanê winasênan tedbîran bigêrê.