Vervatoxa Rêxistina Xaçê Sûrî ya Îtalya Francesca Basile dîyar kerd ke mîyanê 24 saetan de qasê 6 hezar koçberî bi 120 keştîyanê cîyayan resayî Lampedusa.

Rojnameyê Corriere della Sera dîyar kerd ke hûmara koçberan resaya 7 hezar kesî. RTBFyî pare kerd ke koçberî 6 hezar û 800 kesî yê.

Merkezê pêşwazîkerdişî ya bi kapasîteya 400 kesan bi temamî debîyo. Polîsanê Îtalya xîret kerd ke bi seyan koçberan waşt ke welatî biteriknê û polîsî nînan asteng kenê.

Goreyê Ajansê Xeberan ê Îtalya ANSA, Şaredarê Girawe Filippp Manninoyî şanê çarşemeyî rewşa îstîsnayîye îlan kerda.

Hukmatê Giorgia Melonî yê raştgîrî menga nîsane de pêro welat de birêka winayêne girewtbî.

Wezîrê Karanê Teberî yê Îtalya Antonia Tajaniyî derheqê babete de vat: ''Seba hetkarîya bi roniştoxanê Lampedusa û koçberan destê ma ra çi yeno ma do bikerê.''

Seba kêmkerdişê qerebalixê zêdeyî yeno plankerdene ke koçberî parçe bi parçe şaristananê bînan de bêrê cakerdene.