Nêweşîya Korona de ke menga kanûne de şaristanê Wuhanî yê Çînî de vejîya werte û 170 welatan rê vila bîyî dinya tehdît kena. Kesê ke nêweşîye girewte hûmara înan bîye nizdê 200 hezarî û hûmara înan ke Korona ver merdî 6 hezar û 400 ra ravêrte.

Tirkîya

Selahîyetdaranê Tirkîya da zanayene ke hûmara nêweşanê Korona resaye 18. Yeno vatene ke hûmar beno ke hîna bibo zaf.Wezîrîya Karanê Dîyanetî yê Tirkî eşkera kerd ke heta wedaranayîşê tehlukeyê Korona mabên dîyayo nimajê cematî. Partîya Demokratîke ya Şaran (HDP) zî Heyetê Îdarayanê Herêmî yê Demokratîkan û îdarekaranê şaredarîyan rê  semedê tedbîranê vera Korona pêroyîname şawit.

Îran

Selahîyetdaranê Wezîrîya Weşîye yê Îranî da zanayene ke  24 saetanê peyênan de 129 kesî merdî û hûmare bîye 853. Hûmara nêweşan zî resaye 14 hezar 991. Îran Çîn û Îtalya ra dima rêza hîrîne de ya ke nêweşê tewr zaf tede estê.

Almanya

Almanya rîyê Korona ra sînorê xo bi panc cîrananê xo girewt. Fransa, Danîmarka, Luksemburg, Awusturya û Swîsre ke sinorê ci ame girwtene têna do wesayîtê ke bero tîcarî kirişenê bieşkê ravêrê.

Belçîka

Belçîka de cinîyêka 88 serre rîya Korona ra wefat kerd. Hûmara merdeyan bîye 5 û hûmara nêweşan zî resaye 1.058. Hûkmatî vera janê Korona butçeyê lezabezî yê 1 mîlyarî euro bewlî kerd.

Çîn

Çîn de 6 kesê ke teberê welatî ra ameyî de virus ame tesbîtkerdene.  Bajarê Vuhanî ke tede virus vejîya werte de 4 kesê bînî newe nêweş kewtî.

Fransa

Goreyê Ajansê AFP Fransa de Korona vila bena. Heta ewro 5 hezar kesan de nêweşîye ameye tesbîtkerdene  û 127 kesî merdî.

Îngîlîstan

Îngîlîstanî de sebe ke tedbîrê vera Korona qîm nêkenê verê Konutê Serekîye de nêrazîbîyayîş ame ramotene. Çalakîye de ame waştene ke wa hukmat tedbîran zêdêr bikero.

Îtalya

Îtalyaya ke rîyê Korona ra nizdê 200 hezar kesan cuya xo vînî kerde şarî ra yeno waştene ke heta ke mecbur memanê wa mevejê teber. Îtalya de hûmara merdeyan bîye 1809 û ya nêweşan bîye 24 hezar 747.