NY: Hêrişê Tirkîya çarçewa sûcê şerî de yê

Neteweyanê Yewbîyayeyan (NY) dîyar kerd ke hêrişê Tirkîya yê vera Rojawanî çarçewa sûcanê şerî de yê.

Komîsyonê Cigêrayîşê Sûrîye yê NYyî raporê Sûrîye yê 1ê çeleyî-30ê hezîrana 2022yî eşkera kerd. Bi beşdarîya Serekê Komîsyonê Cigêrayîşî Paulo Pinheiro, endamanê Komîsyonî Hann Magallyî û Lznn Welchamî kombîyayîşê çapemenîye de rapor ame eşkerakerdene.

Serekê Komîsyonê Cigêrayîşî Pinheiroyî rapor ercna û vat: ''Sûrîye nêeşkena şerêkê hîrayî rê daymî biba la beno ke welat ver bi na rewşe şino.'' Pinheiroyî da zanayene ke dewleta tirke vera Rojawanî gefan wena, herême de sivîlî raştê hêrişan yenê, mal û mulkê sivîlan yenê xespkerdene û nê pêro sûcê şerî yê.

Rapor de ame parekerdene Artêşa Millî ya Sûrîye (OSO) û cerganê dewleta tirke Efrîn de sûcê şerî zêdînayî û nê kesanê ke eleqeyê înan ê bi Îdareyê Xoserî est o, destbend kenê, îşkence kenê û cinîyan rê zî tecawuz kenê. Rapor de bale ameye antene ser ke artêşa tirke û endamê OSOyî dest nanê erazî, dar, keye, mal û mulkanê şarî ser.

Rapor de ame vîrvistene ke hêrişê Tirkîya yê vera Kobanê de 9ê çeleyê 2022yî de 12 kesî birîndar bîyî, kesêk kişîya û no zî sûcê şerî yo.

Rapor de qala serebûtanê Kampa Hol û Roje û hêrişanê DAÎŞî ameye kerdene û veng dîya ke pêro dewletî hemwelatîyanê xo yê endamanê DAÎŞî bigêrê, paştî bidê têkoşînê QSDyî yê vera DAÎŞî.

Rapor do 22ê êlule de Ofîsê Cenevre yê NYyî de pêşkêşê Roniştişanê Heqanê Merdiman ê 51. bêro kerdene.