Neteweyanê Yewbîyayeyan (NY) seba koçberanê ke bi hewteyan o serê sînoranê Tunusî yê nêzdîyê Lîbya û Cezayîrî de mehsur mendê veng da ke cade mesele bêra çareserkerdene.

Komîserîya Berze ya Multecîyan a Neteweyanê Yewbîyayeyan (UNHCR) û Rêxistina Koçî ya Mîyanneteweyîye (IOM) bi eşkerayîyêka hempare waşt ke wa na trajedî bêra qedînayene.

Wird dezgehan pare kerd ke ê weşî û asayîşê bi seyan kesan ra qerqilîyenê.

3yê temmuze de seba ke kesêkê tunusijî pêrodayîş de dinyaya xo bedilnaye koçberanê Afrîka reyna ameyî koçberkerdene. Rêxistinanê komelê sivîlî dîyar kerd ke koçber û multecîyî waranê çolî yê nêzdîyê sînoranê Lîbya û Cezayîrî de yê û terkê qederê xo bîyê. Nê koçberî nêeşkenê werd û awe zî bivisnê destî û çol de bêçare mendê.

Goreyê Rêxistina Teqîbkerdişê Heqanê Merdiman (HRW) serê temmuze ra heta nika polîsanê Tunusî nêzdîyê 1200 kesê afrîkayîjî koçê sînoranê Lîbya û Cezayîrî kerdî.