Papa do serra 2020 de şiro serdana Başûrê Kurdistanî

Ame pêhesnayene ke rayberê Katolîkan o ruhanî Papa Franciscus do Sibat a 2020’î de dest bi geyrê xo yê Rojakewtena Mîyanêne bikero û şiro serdana Hewlêrî zî.  

Welatê ke rayberê Katolîkan o ruhanî Papa Franciscus do serra 2020 de şiro serdana înan ameyî eşkerakerdene.

 Goreyê nê Papa Franciscus çarçewaya metnê mucadeleyê hemverê şidetî de, ke Sibat a serra 2019’î de paytextê Mîrekîyanê Ereban ê Yewbîyayeyî Abû Dabû de bi Şêxê El Ezherî Îmam Ahmed el Tayyebî dir mor kerdibi, do dest bi geyrê Rojakewtena Mîyanêne bikero. 

 Menganê destpêkê serre de Papa do şiro serdana paytextê Iraqî Bexda û dima ra zî bajarê Necefî de ke zafaneyê ronişteyanê ci Şîa yê bi rayberê Şîa yê dînîyî Ayetûllah Alî Sîstanîyî dir pêvînayîş bikero.

Goreyê ajansê xeberan ê Katolîk Kathpressî, geyrê Iraqî de do Papa şiro serdana paytextê Herêma Kurdistanî ya Federeye Hewlêr. Ame pêhesnayene ke Papa do Hewlêr de hem îdarekaranê herême dir û hem zî bi temsîlkaranê kemîhûmaran ê Xirîstîyanan ê herême dir pêvînayîşan bikero.

Kardînalê Patrîkîya Keldanî-Katolîk Mar Louîs Raphael Sakoyî ajansî rê qisey kerd û vat ê serdana Papa Franciscusî ra xeylî biumîd ê. Sakoyî ard ziwan ke tena se ra 50’ê Xirîstîyanan ê ke dimayê hêrişanê çeteyê DAÎŞ’î ra remaybî agêrayê û vat êyê ke mendê zî şîyê Ewropa, Awûstralya û Amerîka. Heman wextî de vat ke serdana herême de ê pawenê ke Papa seba Xirîstîyananê herême peyamanê muhîman bido.