Raporê Pentagonî de ame vatene ke cerganê DAÎŞî seba ke hêrişê welatanê rojawanî bikê ''wext û firsendî'' dîyî.

Rapor hetê Daîreyê Teqîbkerdişî yê Wezaretê Pawitişî yê Amerîka (Defense Intelligence Agency-DIA) ra ame amedekerdene. Raporî de ame vatene "DAÎŞ peyserancîyayîşê yewînanê DYA û hêrişanê Tirkîya ra dima newe ra xo rêxistin keno û planê hêrişê teberê welatî keno."

Pentagonî vat: "Cergê DAÎŞî eşkenê 'vengîya asayîşî ra' hêz bigêrê. Cergî seba ke hêrişê welatanê rojawanî bikê û bask û yewînanê xo yê globalan xurt bikê beno ke wayîrê 'wext û firsendanê manewra' yê.''

Pentagonî hişyar kerd ke cergê DAÎŞî beno ke reyna herêmanê Sûrîye kontrol bikê û asta mîyanneteweyî de biwazê erdanê xo hîra bikê. Pentagonî îfade kerd ke kiştişê şefê DAÎŞî Ebûbekîr El-Bexdadî seba DAÎŞî tesîrêko pîl nîyo. Raporî de ame vatene ke cergê DAÎŞî seba ke hêrişê Hêzanê Sûrîya Demokratîke bikê tay hucreyanê ci yê nêaktîfan çalakîyî kerdî.