Lîbya de terefan adirbirnayîşêkê mendeyî ser o pêkerd. Goreyê peymane ganî leşkerê bipereyî herême ra vejîyê. Washington zî wazeno nê leşkerî wa şorê. Erdogan xîret keno ke adirbirnayîş sabote bikero.
Neteweyanê Yewbîyayeyan (NY) 23ê teşrîna verêne de pare kerd ke Halîfe Hafter û Hukmatê Yewîya Neteweyîye peymanêka adirbirnayîşî ya mende ser o pêkerd. Dima ke terefan peymane îmza kerde Sekreterê Pêroyî yê NYyî Antonia Guterresî vat: ''Seba haştîye û aramîye gamêka girîng a.''
Konferansê Berlinî çeleyê 2020î ra nata 3 komîsyonan seba çareserîya krîzî pêvînayîş kerdêne. Pêvînayîşanê peyênan ê Cenevre de babetê asayîş û leşkerîyî ser o ame qiseykerdene.
Peymane sey averşîyayîşêkê girîngî ameye ercnayene la nêzanîyeno ke do bêra caardene yan nê. La wird terefan zî ard ziwan ke ê goreyê peymane do têbigêrê.
Goreyê peymane leşkerê bipereyî 23ê teşrîna verêne ra dima mîyanê 90 rojan de ganî Lîbya ra vejîyê. Komîteyê leşkerî yê hemparî do çimdarîya caardişê peymane bikerê û mekanîzmaya apeyantişî û asayîşê welatî ser o vinderê.
Erdogano ke paştî dano hukmatê Trablusî û çek, pere, leşkeranê bipereyî erşawitî Lîbya, seba sabotekerdişê adirbirnayîşî dest pê xebate kerd.
Serekkomarê Tirkîya pê peymane yarî kerd û îdîa kerd ke peymane biasayîş nîya. Erdoganî vat: ''Na peymane asta kilme de ya. Ma do bivînê ke do senî mende biba.''
Peymane ra dima DYA bi eşkerayîyêke waşt ke 'şerwanê xerîbî' wa welatî ra vejîyê.
