Vizêr keştîya koçberan qeraxanê Nêmgirawa Peloponezî yê Yunanîstanî de cumê awe bîye. Yewinanê asayîşê qeraxî da zanayene ke tewr tay 79 kesî merdê, 104 kesî ameyê xelisnayene. La goreyê medyaya yunanan bîlanço hîna giran a.

Goreyê agahîyanê verênan keştîye Lîbya ra şîyêne Îtalya û zafê koçberê keştîye Sûrîye, Pakistan û Misirî ra bîyê.

Ame parekerdene ke dima ke motorê ci xeripîyayo keştîye 15 deqayan de cumê awe bîya. Vervatoxanê hukmatê Yunanîstanî ra Ilias Siankantariyî vat: ''Ma nêzanenê ke keştîye de çend kesî est bîyê la ma zanenê ke bazirganê merdiman seba ke keştîye kontrol bikerê merdiman tede teng kenê.

Teyarayêka Frontexo ke sînoranê Yewîya Ewropa pawena, roja sêşemeyî keştîyêke tesbît kerde. Selahîyetdaranê Yunanîstanî îdîa kerd ke koçberan hetkarîya teyara red kerda. Rêxistinê komelê sivîlî pê na îdîa bawer nêkenê.

Rêxistina Koçî ya Mîyanneteweyîye wina texmîn kena ke keştîye de 400 koçberî est bîyê. La koçberê ke xelisîyayê vanê ke keştîye de 100ê ci domanî tewr tay 750 kesî est bîyê.

Serekkomara Yunanîstanî Katerina Sakellaropoulou şîye cayê serebûtî. Serekwezîr Ionnis Sarmazî seba hîrê roja şîn îlan kerd.

Sereka Doktoranê Dinya venga dewletanê dinya da ke dengiz de polîtîkayêka raştikêne ya xelisnayîşî bikerê. Rigale vat: ''Dengizê Sipîyî de serra 2014î ra nata 20 hezar kesî merdî. No dengiz goristan o. Ganî Frontex karî war verdo. Wa dewletî seferberîyêka xurte bikerê. Herinda sozan de xelisnayîşê merdiman lazim o.''