Qeraxanê Girawa Agathonissiyî yê Yunanîstanî de serê sibayî keştîya multecîyan cûmê awe bîye. Derheqê nasnameyanê multecîyan û şertanê qezayî de agahîyêke nêameye dayene.

Selahîyetdaranê polîsanê lîmanî AFPyî rê pare kerd ke netîceya serebûtî de cinîyêka multecîye dinyaya xo bedilnaye û 18 kesî xelisîyayê.

Hûmara koçberan û multecîyan her ke şina zêdîyena. Goreyê Komîserîya Berze ya Multecîyan a NYyî (UNCHR) 2022 de 18 hezar û 700 kesî û heta na menga 2023yî zî 38 hezar û 448 kesî bîyê multecî.

Her roje raywanîya multecîyan de trajedîyêke qewimîyena. Tewr peyên 14ê hezîrane de qeraxanê Pylosî yê Yunanîstanî de keştîya multecîyan cûmê awe bibî, 82 kesî xeniqîyabî û bi seyan kesî zî vînî bibî. Na trajedî ser o hema zî selahîyetdarê Yunanîstanî yenê sûcdarkerdene.  Goreyê sûcdarîye Yunanîstan seba ke koçber û multecîyan nêgêro keştîyanê nînan ver bi Îtalya û Dengizê Egeyî tan dano.