Wezîrîya Karanê Teberî ya Iraqî derheqê Qirkerdişê Zaxoyî de mesajêk şawit Konseya Asayîşî ya NYyî û vat: ''Ma 22.740 binpaykerdişî û hêrişî tesbît kerdî.''

Wezîrîye vat: ''Peyê hêrişanê dewleta tirke de hedefê Tirkîya yê winayênî est ê ke wazena warê xo hîra bikera. Derheqê asayîşî û leşkerîye de qet yew peymana ma bi Anqara çin a. Ma wazenê dewleta tirke uzrê xo Iraqî û şarê Iraqî ra biwaza.''

Eşkerayîye de ame waştene ke wa Konseya Asayîşî derheqê şermezarkerdişê hêrişanê dewleta tirke yê serê serwerîya Iraqî de deklarasyonêkî biweşîna.

Serekê Artêşa Iraqî Abdul Emîr Raşîd Yarallahî da zanayene ke seba serwerîya kontrolê Iraqî ganî hêzê tirkan waranê Iraqî ra vejîyê û seba ney zî hêzê çekdarî û pêşmergeyî nê herêman de ca bibê. Yarallahî parlamentoyê Iraqî e qisey kerd û vat: ''Hêrişê ke hêzê tirkan kenê zêdîyayî û mîyanê Iraqî de nêzdîyê Dihokî de se çeperê dewleta tirke est ê.''

Kombîyayîşê lezgînî yê Konseya Asayîşî de Temsîlkara Taybete ya NYyî ya Iraqî Jeanîne Hennîs-Plasschaert ard ziwan ke ê seba tehqîqatêkê hemparî amade yê û vat: ''Tirkîya amade ya ke Iraqî reyde mesele biercna.''

Jeanîne Hennîs-Plasschaert îfade kerd ke hêriş de 3ê ci domanî 9 kesan dinyaya xo bedilnaya û 33 kesî zî birîndar bîyê.

Jeanîne Hennîs-Plasschaert vist vîrî ke PKKyî hêrişî ra dima eşkerayîye daya ke hêzê înan Zaxo de çin ê.

Jeanîne Hennîs-Plasschaert pare kerd ke hêrişê vera waranê turîstîkan bêhurmetîyêka pîl a û vat: ''Qedîyayîşê hêrişanê vera Iraqî zaf girîng o. Nê hêrişî alozîya vera herême zêdînenê û benê sebebê trajedîyanê pîlan.''