7ê teşrîna verêne ra nata şerê Hamas û Îsraîlî de bîlançoya merdimatîye her roje bena giranêr.

Goreyê bîlançoya peyêne ya Îsraîlî hûmara merdeyan 1200 ra zêdeyêr a û hûmara birîndaran zî 2800 ra zêdeyêr a. Hetê Filîstînî de zî tewr tay 1200 kesî merdî, tewr tay 5600 kesî birîndar bîyî. 

Artêşa Îsraîlî dabi zanayene ke erdê Îsraîlî de cenazayê 1500 şerwananê Hamasî ameyê dîyene.

Goreyê eşkerayîya artêşa Îsraîlî Şerîdê Gazze de înan dayo xeylêk merkezanê Hamasî û 2687 hedefan ro. 

Ofîsê Koordînasyonê Heqanê Merdiman ê Neteweyanê Yewbîyayeyan (OCHA) pê hesna ke hêrişan de Filîstîn de 1000 banî rijîyayê, 560 bînayî texrîb bîyê û tewr tay 338 hezar kerdî neçare mendê ke wareyanê xo biteriknê.

Hetê bînî ra 7ê teşrîna verêne de hêrişê Hamasî yê vera Îsraîlî de xeylêk kesê xerîbî zî kişîyayî û vîndî bîyê. Goreyê texmînan 17 kesê vîndîbîyayeyî sey esîran destê Hamasî de yê.

Wezîrê Enerjî yê Îsraîlî Îsrael Katzî roja pancşemeyî hesabê xo yê Xî ser de pare kerd ke heta ke esîrî destê Hamasî de bibê awe, ceyran û sotemenîye nêrê dayene Gazze. 

Hamasî şanê çarşemeyî îdîa kerd ke cinîyêke û di domanê îsraîlijî vera dîyayê. La medyaya Îsraîlî zî îdîa kerd ke Hamas şarî xapîneno.