Îran de rîyê bêusûlîyan, talanê çimeyanê malîyan, enflasyonê berzî û ambargoyê Amerîka ra krîzêko ekonomîk o pîl esto.

Peynîya hewteyî de xeylêk şaristananê Rojhelatê Kurdîstanî û Îran de mamostayî şertê xebitîyayîşî û meaşî bêrê weşkerdene vejîyayî kuçeyan. Mamostayî wazenê ke meaşê înan bigêrîyê çarçewa karmendîye, heqê înan ê teqawut û ê karmendan seyci bibê û mamostayê ke ameybî tepiştene wa vera bidîyê.

Vizêr zî vengdayîşê Sendîkaya Mamostayan ser o mamostayî ameyî yewca. Goreyê xebera Ajansê ILNA mamostayî 'planê weçînayîşê karî' wazenê.

Rojhelatê Kurdîstanî de zî sere de Kirmanşah û Sine de xeylêk şaristanan de mamostayî vejîyayî meydanan.

Mamostayî peynîya menga çeleyî de bi heman waştişan vejîyabî kuçeyan.