Rûsya de peynîya hewteyî de koma leşkeranê bipereyan Wagnerî vera îdareyê artêşa rûsan û Wezîrê Pawitişî Sergey Şoyguyî serewedaritişêk dabi destpêkerdene. Serekê Wagnerî Yevgeny Prigojinî xo rê Şoygu kerdbi hedef. Putinî no serewedaritiş sey xayînîye pênase kerd û vat ke cezaya ci do giran biba. Di rojan ra dima pêkerdişêkî ser o serebût vinder, Prigojinî leşkerê xo apey antî û roja dişemeyî vat: ''Armanê serewedaritişî binvistişê hukmatê Moskova nêbi.''

Rojnameger Aykan Severî serebûtê Wagnerî ANFyî rê ercna.

Severî îfade ganî serebût çarçewa şerê dinya yê hîrêyînî de bêro ercnayene û vat: ''Na mesele teyna Rûsya eleqedar nêkena. No serebût raşta raşte beşêkê pêkewtişanê Şerê Dinya yê Hîrêyînî yo. Karakterê nê şerî de serebûtê winayênî qewimîyenê. Şerê Ukrayna bi derg û Putin ser nêkewt. No zî tesîrê Rûsya keno. Vilabîyayîşê Yewîya Sovyetan ra dima kapîtalîzmê olîgarkan dest pêkerd. Reyna şerê Ukrayna ra mabênê Serekê Pêroyî yê Artêşe û Wezîrê Pawitişî û serekê çeçenan de zî nakokîyî est ê. Çew nêwazeno mesuldarîya binkewtişî bigêro xo ser. Wezîrê Karanê Teberî yê Rûsya Sergey Lavrovî şerî ra 15 rojan verî vatbi 'Ê wazenê ma bivisnê mîyanê Afganîstanêkê neweyî.' Ey waştêne bale bianco rijîyayîşê Sovyetan ser.''

Severî bale ante xoapeyantişê Wagnerî ser û vat: ''Wagnerî şer de sey hetê qelsî yê Rûsya ameyêne mojnayene û vajîyayêne ke o do teyna bimano. 2018 de Reqaya Sûrîye de barkerdişê petrolî ser o pêkewtiş qawimîya û tîya de 200 endamê Wagnerî hetê Amerîka ra kişîyayî. Wagner nê serebûtî sey sûcê Serfermandarîya Rûsya vîneno ke no raşt o. Çunke mabênê înan û îdareyê Amerîka de koordînasyonêk est o. No zî mojneno ke mabênê Wagnerî û artêşa Rûsya de şerê menfaetan est o. Şerê Ukrayna de artêşa Rûsya nêeşkaye Bakhmoutî nêgêra û Wagner vist dewre. Wagnerî goreyê xo fedakarîyêka pîle kerde û no ca girewt. Vera Wezîrê Pawitişî û Serfermandarîye pozîsyonêko avantajin vist destî û waşt ke îqtîdarî ra hîna zaf çî biwazo.''

Severî ard ziwan ke Erdoganî serebût de paştî daye Putinî û vat: ''Mabênê Erdogan û Putinî de têkilîyêke est a û Erdogan biwazo zî nêeşkeno na têkilîye bibirno. Goreyê Putinî o eşkeno Tirkîya bişuxilno. Erdoganî serebutê Wagnerî ra dima Putinî rê telefon kerd la dima zî Sekreterê NATOyî de pêvînayîş kerd. Xûlasa eke Rûsya bikewa mîyanê zaefî Afrîka zî tede Kafkasya, Asyaya Mîyanêne, Sûrîye, Iraq û Başûrê Kurdîstanî de do verê Tirkîya abikera. Weçînayîşan ra verî pisporanê Amerîka Tirkîya ra waşt ke wa vera Rûsya, Çîn û Îranî blokêkî organîze bikera. Yanî na mesele teyna Erdoganî ney dewleta tirke eleqedar kena.''