Vayê benzînî ra dima roja îneyî 32 eyaletanê Îranî de û Rojhelatî de şarî sere wedarit. Rejîmê Îranî seba ke nawnayîşî rayaumûmîya dinya de vila nêbê roja şemeyî şan xetê înternetî û vizêr serê sibayî zî xetê telefonan ê sabîtan zî tede xetê telefonî birnayî.

Şaristanê Bînî zî Payan Ser ê

Zencan, Sîmnan, Hemedan û merkezanê nê şaristanan de zî nawnayîşan dest pêkerd. Rîyê birnayîşê xetanê telefon û înternetî ra xeberê zelalî nênê girewtene. Hêzê Asayîşî yê Îranî û polîsan wesayîr roma şarî ser o û guleyî nayî pa. Gore tay çimeyan nawnayîşan de tewr tay 30 kesî ameyî kiştene, hezar kesî birîndar bîyî û 6 hezar kesî ameyî destbendkerdene. Gore tay çimeyanê bînan zî humara merdeyan 200 a û 3 hezar kesî zî mergî ra xelisîyayî. Yeno parekerdene ke şaristanê Merîvane ya Rojhelatê Kurdîstanî de 12 kesî ameyî kiştene û 30 kesî zî birîndar bîyî.

Rejîmî Gef Werd

Parlamentoyê Îranî kom bi û birre daye ke ganî nawnayîşkeran reyde kom bibê, temsîlaranê hêzanê leşkerî gef ro nawnayîşkeran werd. Hêzanê Pawitoxanê Şorişî beyanatêk da û gef ro nawnayîşkeran werd. Beyanatî de ame vatene ke seba ke nawnayîşakeran bitepişê ê amade yê ke hêzanê asayîşî reyde tevbigêrê. Temsîlkarê Eyaltê Farsî yê Alî Hamaneyî Ayetullah Lutfullah Dejkamî zî vat: "Eke Konseya Asayîşî yê Farsan heta serê sibayî nê nawnayîşkeran nêedilna ma do hêzanê milîsan (Besîç) reyde Şîrazî de bivejîyê meydanan."