Serewedaritişê 'jin, jiyan, azadî' roja 50. de yo

Îran û Rojhelatê Kurdîstanî de çalakîyanê protestoyî 50 rojî xo pey de verdayî. Şar vera tepişîyayîşê bi hezaran kesan û qirkerdişan serewedaritişî rê dewam keno.

Îran û Rojhelatê Kurdîstanî de çalakîyanê protestoyî 50 rojî xo pey de verdayî. Şar vera tepişîyayîşê bi hezaran kesan û qirkerdişan serewedaritişî rê dewam keno.

Têgêrayîşê şarî yo ke tira 'Şorişê Jin Jiyan Azadî' vajîyeno nê 50 rojan de bi formanê bînan ê sey grevî dewam kerd. Çalakîyan de her beşê komelî serkêşîya kurdan de rolêkê aktîfî keno. Ewropa û Amerîka de dîyasporaya îranijan zî vera rejîmê Îranî têgêrena.

Vizêr roja 49. ya çalakîyan de seba ke roja 40. ya şînî ya ê kesanê ke çalakîyan de ameyê qetilkerdene bîye, protesto û çalakîyê pîlî ameyî kerdene.

Şaristanê Şabadî yê eyaletê Kirmaşanî yê Rojhelatê Kurdîstanî de seba roja 40. ya qetilkerdişê Saîd Muhammedî yadkerdişêko pîl ame kerdene. Reyna şaristananê sey , Seqiz, Bane, Kamyaran, Meriwan, Bokan, Mahabad, Urmiye, Bijarî yê Rojhelatê Kurdîstanî de serkêşîya cinî û ciwanan de çalakîyî ameyî kerdene.

Tehran de çalakîkeran rayîrî qefilnayî. Isfahan de reyna seba roja 40. ya şînî çalakîyî ameyî kerdene.

Goreyê rêxistinanê heqanê merdiman û çimeyanê muxalîfan heta nika çalakîyan de tewr tay 450 kesî ameyê qetilkerdene û 25 hezar kesî zî ameyê destbendkerdene.

Dîya zanayene ke 6 çalakîkeran rê zî cezaya îdamî dîyaye. Mîyanê nê kesan de deyîrbazo kurd Samîn Yasîn (Seydî) zî est o ke pê deyîran paştî dayêne çalakîkeran. Yasîn Kirmanşah de bi îşkence ame tepiştene û 3ê teşrîna peyêne de mehkemeya Îranî cezaya îdamî daye ci.

Bire ra dima şaristananê Rojhelatê Kurdîstanî û Îranî de ciwanan mehkeme protesto kerde û her hetê dinya ra hunermendan paştî da hunermendê kurdî Yasînî.