16ê êlule qetilkerdişê Jîna Emînî ra nata Rojhelatê Kurdîstanî û Îran de serewedaritişê şarî bêmabên dewam keno. Roja yewşemeyî zî xeylêk şaristanan de mabênê çalakîkeran û hêzanê dewlete de şer qewimîya.

Şaristanê Merîwanî yê Rojhelatê Kurdîstanî de hêzanê dewlete şar da guleyan ver. Goreyê çimeyanê herêmîyan tîya de tewr tay 35 kesî birîndar bîyî. Dima ke wendekarêk hetê polîsan ra roje şemeyî Tehran de kişîya nawnayîşî zêdîyayî. Medyaya dîjîtale de bi vîdeoyan weşanîya ke şarê Merîwanî kerrayî eştî hêzanê Îranî, rayîrî girewtî û sloganî vatî.

Şaristananê Sine, Seqiz û Kirmaşanî yê Rojhelatê Kurdîstanî de zî çalakîyê protestoyî ameyî kerdene, Bokan de bi sloganê 'jin, jiyan, azadî' rayraşîyayîşêk ame kerdene. Sine de ciwanan şewe adir vist ta û rayîrî girewtî.

Şaristanê Zahîdanî yê Belûçîstanî de wendekaran çalakîya rayraşîyayîşî kerd, nimajê îneyî ra dima zî mabênê şar û hêzanê dewlete de zî pêkewtişê giranî qewimîyayî. Rêxistina Heqanê Merdiman a Îranî (IHR) da zanayene ke 16 kesî ameyê qetilkerdene û Rêxistina Efû ya Mîyanneteweyîye zî pare kerd ke hêrişê dewleta Îranî de tewr tay 10 kesî ameyê qetilkerdene. Goreyê IHRyî 30ê êlule ra nata tewr tay 118 kesî Zahîdan de ameyê qetilkerdene.

Zanîngehanê Tehran, Buşehr û Babolî de wendekaran çalakîyî kerdî.

Goreyê raporê IHRyî destpêkê serewedaritişî ra nata 41ê ci domanî 304 kesî ameyê qetilkerdene. Komêka muxalîfe ya bi nameyê Koma Mucahîdanê Şarî ya Îranî da zanayene ke çalakîyî 2016 şaristanan rê vila bîyê 358 kesî ameyê qetilkerdene.

Rejîmê Îranî heta nika bi des hezaran çalakîkerî destbend kerdî û tepiştî ke mîyanê înan de rojnameger, avûkat, kesê namdarî û pawitoxê heqanê merdiman zî est ê. Rejîmî bi desan kesan rê zî cezaya îdamî daye.