Dima ke cinîya kurde Jîna Emînî 16ê êlule de Tehran de hetê 'polîsanê exlaqî' yê Îranî ra amebî qetilkerdene serewedaritişê Rojhelatê Kurdîstanî û Îranî dest pêkerdbi. Çalakîyanê Rojhelatê Kurdîstanî û Îranî yê bi şîarê 'jin, jiyan, azadî' 87 rojî xo pey de verdayî.

Roja şemeyî şaristanê Sine de bi desan wendekaran ê cinîyan ê Dibistana Perwerdeyê Teknîkî bi sloganê 'jin, jiyan, azadî' çalakîyêka rayraşîyayîşî kerde. Goreyê agahîyanê ke ameyê girewtene hêzanê dewleta Îranî hêrişê wendekaran kerd û xeylêk kesî birîndar bîyî.

Şino de di birayî  Ferhad û Ferzad Teha Zade yê ke çalakîyan de ameybî destbendkerdene hetê mehkeme ra cezaya îdamî dîyaye înan.

Şaristananê Îranî de bi taybetî Tehran û Îsfahan de rayraşîyayîşê bêvengî ameyî kerdene. Rixmê ney zî hêzanê dewleta Îranî hêrişê şarî kerd.

Xeylêk zanîngehan de zî nêrazîbîyayîşê wendekaran dewam kenê.

Goreyê Rêxistina Heqanê Merdiman a Îranî 16ê êlule ra nata tewr tay 458 kesî ameyê qetilkerdene ke nînan ra 63yê ci doman û 29ê ci zî cinî yê.