Seyîd Riza û embazê ey do bêrê yadkerdene

Rayberê Serewedaritişê Dêrsimî Seyîd Riza û 6 embazê ey serrgêra îdamê înan a 82. de Merkezê Kulturî yê Şîşlî de do bêrê yadkerdene.

Seyît Riza û embazanê ci vera birra 'tevgêrayîşê tedîp û tenkîlî' ya ke Dewleta Tirkan dima ke îdareyê komare îlan kerd bi armancê 'netewe-dewlete' 4 gulana 1937î de bi fermanê heyetê wezîran vera Dêrsimî girewte sere wedaritibî. Seyît Riza û embazê ci 15 teşrîna peyêna 1937î de Meydanê Bugdayî yê Xarpêtî de ameyî dardekerdene. 16ê teşrîna peyêne de Seyîd Riza û embazê ci serrgêra dardekerdişî de bi şewêke do bêrê yadkerdene.

Şewa yadkerdişî hetê Rojnameyê Dêrsimî û Merkezê Cigêrayîşanê Dêrsimî ra Merkezê Kulturî yê Şîşlî de do bêra kerdene. Şewa yadkerdişî bi şîara 'Yeno Ma Vîrî, Ma Yad Kenê, Xo Vîrî ra Nêkenê' 16ê teşrîna peyêne roja şemeyî do bêra serûberkerdene.

Şewa yadkerdişî de Ayfere Duzdaş, Ciwan Adar, Dogan Çelîk, Saît Baksi, Taylan Yildiz bi kilamanê xo, Ahmet Can Akyol, Hidir İşik, Nesîmî Aday, Ozgun E. Bulut zî bi şîîranê xo do ca bigêrê. Şewe de Grûba Dansî ya Mezopotamya kayê 'Çar Berî, Çar Maqamî' do pêşkêş bika.

Seyît Riza dima ke vera harekatê Dêrsimî sere wedarit seba 'pêvînayîşê haştîye' venga ey ame dayene ke bêro Erzîngan. Seyît Riza û 72 embazê ci 5ê êlula 1937î de wexto ke seba pêvinayîşê haştîye şîyêne Erzînganî rayîrî de ameyî tepiştene. Seyît Riza û embazê ci 5-13 êlula 1937î de hetê Mehkema Leşkerî ya Xarpêtî ra ameyî hukmkerdene û derheqê înan de birra dardekerdişî ameye dayene. Seyît Riza û embazê ey 15ê teşrîna peyêne de Meydanê Bugdayî yê Xarpêtî de ameyî dardekerdene.