Vakurê Fasî ra qasê 2 hezar koçberan xîret kerd ke derbazê Melillaya Spanya bibê û nînan ra 23 koçberan dinyaya xo bedilnaye. Dîya zanayene ke 18 koçberî û endamêkê hêzanê asayîşî zî birîndar bîyî.

Xeylêk komeleyanê Fasî waşt ke derheqê babete de tehqîqat bêro kerdene. Komeleya Heqanê Merdiman a Fasî ra Omer Najîyî  waşt ke wa pêro detayê serebûrî bêrê eşkerakerdene.

Serekwezîrê sosyalîstî yê Spanya Pedro Sanchezî zî Madrid de kombîyayîşê çapemenîye kerd û vat: ''No karo organîze yê qeçaxçîyanê merdiman o.''

Goreyê selahîyetdaranê Spanya 130 koçberî eşkeyê xo biresnê Melilla û nînan ra yew/e zî nêweşxane de binê tedawî de yo/ya.

Rêxistina Koçî ya Mîyanneteweyîye, Komîserîya Berze ya Multecîyan a Neteweyanê Yewbîyayeyan, hukmatê Spanya û partîyanê Spanya zî waşt ke wa serebût bêro eşkerakerdene û tehqîqat bêro akerdene.

Goreyê dîmen û şahîdan polîsî tedayêka giranî kenê, koçberan erzenê pêser û erdî ra derg kenê.

Serekê Nadorî yê Komeleya Heqanê Merdiman a Fasî Muhammed Amin Abidayî vat: ''Mesuldaro verên ê nê felaketî polîtîkaya koçberîye ya Yewîya Ewropa ya ke Fasî rê hemkarîye kena.''