Talîbano ke pê polîtîkayanê xo yê dişmenîye yê vera cinîyan tim rojdem de yo, bi fermanêkî narey zî park û baxçeyî cinîyan rê qedexe kerdî.

Heta nika seba ke cinî û camêrdî parkan de raştê yewbînan nêrê înan rê saetê cîyayî ameybî dîyarkerdene.

Vervatoxê Wezîrîya 'Teşwîqkerdişê Zerrîpakîye û Vergirewtişê Xirabîye' Muhammed Akîf Sadik Muhacîrî AFPyî rê qisey kerd û vat: ''Xeylêk cayan de krîterî ameyî binpaykerdene.''

Muhacîrî ard ziwan ke seba ke krîterî ameyî binpaykerdene înan gamêka winayêne eşta.

Şerê 20 serran ra dima Amerîka Afganîstanî ra hêzê xo antbî û tebaxa 2021î de Talîban reyna bibi îqtîdar. Rewşa cinîyanê Afganîstanî zî Talîbanî ra dima hîna bîye xirab.