Hêzanê Mareşal Halîfe Hafterî vengdayîşê Moskova û Anqara yê seba adirbirnayîşî roja şemeyî qebul kerd.

Hêzanê Halîfe Hafterî derheqê babete de eşkerayîyêka kilme daye û hîşyarî kerde: "Eke terefo bîn adirbirnayîş binpay bikero ma do cewabêkê xurtî bidê ci."

Na eşkerayîye ra dima hukmatê Yewîya Neteweyîye yo ke merkezê ci Trablus de yo serê sibayê yewşemeyî pare kerd ke ê adirbirnayîş qebul kenê.

Serekê hukmatî Fayîz El Saracî da zanayene ke 12ê çeleyî de roja yewşemeyî saete 00:00 ra pey goreyê adirbirnayîşî têbigêrê. Saracî ard ziwan ke vera hêrişanê biîhtîmalan ê do heqê 'pawitişê meşrûyî' bixebitnê.

Serra 2011î ra nata ke NATOyî bi hawayêkê giranî rejîmê Muhammed Kaddafîyî çin kerd Lîbya de kaos esto. Lîbya nika bîye di parçe û rojhelatê Lîbya hetê Parlamentoyê Lîbya ra ke merkezê ci Tobruk de yo yeno îdarekerdene, paytext Trablus zî destê hukmatê Yewîya Neteweyîye de yo.

Her di terefî zî hetê hêzanê cîyayan ra yenê paştdayene. Dewleta tirke û Qatar paştî danê hukmatê Îslamî ke merkezê ci Trablus de yo. Misir, Emîrîyê Ereban ê Yewbîyayeyî, Rûsya û Fransa zî paştî danê hêzanê Heftarî.