Îdlîb de mabênê dewleta tirke û Rûsya de krîz dewam keno. Ame zanayene ke vizêr teyarayanê şerî yê Rûsya Neyrabo ke rojhelatê Îdlîbî de yo de reya diyîne arêşa tirke û çeteyê ci hedef girewtî. Netîceya hêrişî de leşkerê tirkî yê birîndar û merde estê.

Balkêşo  ke  hêriş roja ke mabênê Serekkomerê Tirkî Recep Tayyîp Erdogan û Serekê Dewlete yê Rûsya Vladimir Putin de pêvînayîş ame kerdene, raştê a roje ame. Roja pancşemeyî zî eynî herême de dewleta tirke ya ke hêrişê hêzê rejîmî kerdbi hetê teyarayanê rûsî ra amebî hedefgirewtene. Goreyê Wezaretê Pawitişî yê Tirkî 2 leşkerî merdî û 5 zî birîndar bîyî. Banê Çimdarî yê Heqanê Merdiman ê Sûrîye zî dabi zanayene ke 2 leşkerê tirkî merdî û 25 çeteyî birîndar bîyî.

Ajansê dewlete yê Sûrîye dîmenê hela pirodayîşê tanqanê tirkan serwîs kerdî.

Balkêş o ke sazî û berpirsîyaranê dewlete tirkî eşkera nêkerd ke hêriş hetê kamî ra ameyo kerdene. Vizêr roja ke hêriş ame kerdene, mabênê Erdogan û Putîn de pêvînayîşê telefonî ame kerdene. Goreyê eşkerayîya hetê tirkî  Erdogan waşt ke wa Putin vernîya rejîmî bîgêro. Erdogano ke peyser game eşte roja çarşemeyî wext dabi Sûrîye û Rûsya ke hetê peynîya aşma sibate biancê peyê nuqtayanê çimdarîye. Goreyê eşkerayîya Kremlinî Putin semedê çalakîyanê agresîfan qesawetê xo ard ziwan û vat ganî bandura Sûrîye rê rêz bêro ramotene. Badê pêvînayîşî Wezaretê Karanê Teberî yê Amerîka eşkerayîke daye û vat "Ma kişta muttefîkê xo yê NATO Tirkîya de yê."