Tirkîya, Rûsya û Îran ê ke dewamkerdişê krîzê Sûrîye de sey aktoranê bingeyînan dîyenê, bi îdîaya 'peydakerdişê çareserîye' cara 20. paytextê Kazakîstanî Astana de kom bîyî. 

Dewleta tirke ya ke Sûrîye de pozîsyonê îşxalkerî de ya, pêvînayîşê Astana yo verên bi heyetê Îranî kerd.

Temsîlkarê Taybetî yê Neteweyanê Yewbîyayeyan (NY) yê Seba Sûrîye Geir O. Pedersin zî pêvînayîş teqîb kerd. Urdun, Iraq û Lubnanî zî bi statuyê çimdarîye heyet şawit pêvînayîşan. 

Pêvînayîşî do di rojan dewam bikerê û tede vurnayîşê rewşa herêmî ya Sûrîye û serebûtê bînî bêrê ercnayene. Afernayîşê şert û mercanê agêrîyayîşê multecîyan zî mîyanê babetanê pêvînayîşan de est o. 

Wina pawîyeno ke mabênê Wezîranê Karanê Teberî yê Tirkîya, Rûsya, Îran û Sûrîye de seba asayîkerdişê têkilîyanê Sûrîye û Tirkîya, xerîteya kombîyayîşêkê çar terefan ser o şêwirmendîye bikera.

Dewleta tirke hema zî Rojawanê Kurdîstanî de erdêkê hîrayî ser de îşxalker a. Dewleta tirke nê waranê îşxalkerdeyan de zî rejîmê terorî awan kerd.