Îsraîlî ra ber kes paştî nêdano planê 'haştîye' yê Serekê DYA Donald Trumpî. Serekdewletê Filîstînî Mahmud Abbasî nêrazîbîyayîşê xo mojna û vat: Ma Qudûs nêroşenê.

'Planê Haştîye' yê Trumpî de Qudûs sey parçeyê Îsraîlî yeno nîşankerdene. Seba paytextê Filîstînî zî rojhelatê Qudûsî yeno nîşankerdene.

Goreyê planê Trumpî dewleta Filîstînî do nêba wayîra artêşa xo û Hamaso ke nika Şerîdê Gazze  kontrol keno do bêro bêçekkerdene.

Serekdewletê Filîstînî Mahmud Abbasî vera planê haştîye nêrazîbîyayîşêko xurt mojna û vat: ''Ma Qudûs nêroşenê heqanê xo tewr nêroşenê.'' Abbasî ard ziwan ke no plan vera Filîstînî yo. 

Hamasî zî vera planî nêrazîbîyayîş mojna û vat: "Paytextê Filîstînî Qudûs o. Ma do herinda ey de cayêkê bînî qebul nêkenê."

Neteweyanê Yewbîyayeyan zî verê planê Trumpî de vindert. Vervatoxa Sekreterê Pêroyî yê Neteweyanê Yewbîyayeyan Anronio Guterresî Stephane Dujarric vist vîrî ke tewir û bira Neteweyanê Yewbîyayeyan seke verê cû Konseya Asayîşî ya Neteweyanê Yewbîyayeyan de û Komelê Pêroyî yê Neteweyanê Yewbîyayeyan de ameyî nişankerdene bi heman hewayî dewam kenê. Dujarrice ard ziwan ke Neteweyê Yewbîyayeyî nê tewirê xo de isrardar ê. No zî yeno a mana ke sînorê ke serra 1967î de ameyî eşkerakerdene do bêrê pawitene.

Eşkerayîya Yewîya Ewropa de zî bi hawayêkê kifşî nêbo zî eşkera kerd ke ê plan qebul nêkenê. Temsîlkarê Berzî yê Yewîya Ewropa yê Berpirsîyarê Karanê Teberî Josep Borrellî da zanayene ke yewîye terefgîra çareserîye ya bi muzakereyan a.

Ame zanayene ke Serekwezîrê Brîtanya Boris Johnsonî bi rayîrê telefonî Trumpî reyde qisey kerd û da eşnawitene ke no plan beno ke seba alozîya mabênê Îsraîlî û Filîstînî biba gamêke.

Îqtîdarê Almanya koalîsyonê CDU-SPDyî vera planî rawerişt.Vervatoxê CDU yê Parlamentoya Ewropa Mîchael Gahlerî beyan kerd ke plan rayîrêkê çareserîya pêkerdişî anêkeno. Sekreterê Pêroyî yê SDPyî Lars Klîngbeîlî zî seba planî vat: "Seba pêkerdişî ganî di terefî bibê.''

Urdunî zî derheqê planî de vat ke ganî sînorê 1967î sey esas bêrê girewtene.