10ê kanûne de welatê Yewîya Ewropa (YE) do rojan kom bibê. Rojdemo esas ê kombîyayîşî zî Tirkîya ya. Kombîyayîşî ra verî wezîranê karanê teberî yê 27 welatan Bruksel de vizêr babeta ambargoyê vera Tirkîya ercnaye.

Kombîyayîşê wezîran ra dima  Temsîlkarê Karanê Teberî yê Brukselî Josep Borrellî vat ke rewşa Tirkîya hol nêbena eqsê ci bena giranêr. Borrelî ard ziwan ke bira peyêne do kombîyayîşê 10ê kanûne de bêra girewtene.

Wezîrê Karanê Teberî yê Almanya Heiko Maasî zî îfade kerd ke xîretê seba pêkerdişê Tirkîya bênetîce manenê û bira peyêne do Konseya Ewropa de bêra girewtene.

Wezîrê Karanê Teberî yê Yunanîstanî Nikos Dendiasî pare kerd ke tewirê Tirkîya yê Dengizê Sipî pêru YE rê gef waneno. Wezîrê Avusturya Alexande Schallenbergî zî vat ke ganî Tirkîya vurîyayîşanê radîkalan bikera.

Goreyê medyaya Ewropa zafêr wezîrî wazenê vera Tirkîya ambargo bêro caardene.

Kombîyayîşê vizêrînî de 'Rejîmê Amabargoyî yê Heqanê Merdiman' ame qebulkerdene. Goreyê naye serekdewlet yan zî selahîyetdarê ke merdiman tecrîd kenê, hûrmet nêdanê heqanê merdiman, sûcanê îşkence û tecawuzî kenê do nêeşkê şorê YE, dest neno mal û pereyanê înan ser.

Na peymane sey 'Erdoganî rê mesaj' ame hesibnayene. Maasî vat: ''Êyêke goreyê heqanê merdiman tênêgêrenê do bi rehetî nêrê YE.''

Wezîrê Karanê Teberî yê Luksemburgî Jean Asselbornî zî vat: ''Na bire seba Tirkîya hîşyarî ya.''