Dima ke fermandarê Îranî Qasim Silêmanîyî û berpirsîyaro diyîn ê hêzanê Haşdî Şabîyî Ebu Mehdî El Muhendîs hetê DYA ra ameyî kiştene hêzê Haşdî Şabîyî û komê Şîa yê Iraqî bîyî nêzdî. Hêzê Haşdî Şabîyî kiştişê Qasim Silêmanîyî ra dima bîyî yew û seba ke hêzê xerîbî Iraqî ra bêrê vetene dest pê teda kerd.

Bira parlamentoyî ra dima

Seba ke hêzê Haşdî Şabîyî û Şîa yê Iraqî bîyî yew û înan teda kerd Parlamentoyê Iraqî 5ê çeleyî de kom bî û bire daye ke hêzê DYA û hêzê xerîbî Iraqî ra bêrê vetene.

Na bire ra dima hêzanê Haşdî Şabîyî dest pê karî kerd ke rewşa xo ya parçebîyaye biwedarê û bibê yew.

Netîceyê pêvînayîşan ra dima mabênê îdareyanê komanê Haşdî Şabîyî de yeno vatene ke bire ameye dayene ke babete vetişê hêzanê DYA yê Iraqî de pêro hêzî bîyî yew.

Rayberê Têgêrayîşê Sadrî Muqteda Es-Sadrî temsîlkarê Asaîb Ehl'ûl Hak, Tûgayê Seyîd Şûheda, Têgêrayîşê Nûceba û Seraya Selamî şaristanê Kûmî yê Îranî de ameyî têhet.

Şemerîyî tesdîq kerd

Vervatoxê Têgêrayîşê Nûceba Nasr Şemerîyî derheqê babete de medyaya Iraqî reyde qisey kerd û da zanayene ke bire ameye girewtene ke seba ke DYA Iraqî ra bi temamî bêra vetene 'hêzî bibê yew û koordînekerde'.
Şemerîyî eşkera kerd ke caardişê Haşdî Şabîyî firsend da parlamento û hukmat ke ê bi rayîranê dîplomatîkan hêzanê xerîban welatî ra bivejê.