Serhade: 2021 do biba serra azadîya Rayberîye û çinkerdişê faşîzmî

Endama Koordînasyonê PAJKî Ronahî Serhad: Serra 2021î do biba serra kar û têkoşînî. Seba ke ma Rayberîye azad bikerê û faşîzmî ra hesab bipersê ma do çarçewa hemle de têkoşînê xo bi hawayêkê radîkalî bikerê.

Endama Koordînasyonê PAJKî Ronahî Serhad beşê diyînî yê roportajê xo de têkoşînê cinîyan ê kurdan ê vera şer, faşîzm û şîdetî ercna.

Qiseykerdişê Ronahî ra beşêk wina yo:

''Ma serra 2020î de giranîye daye hemserekîye, sîstemê temsilîya têdûşte, xopawitişê cinîyan û jineolojî ser. Xoverdayîşê vera dewleta tirke, şîdet, îstîsmarê domanan, îşkenceyî pê çekan beno. No rayîr tercîhê ma nîyo la ma neçare yê ke nê rayîrî ra şorê. Nika dest nîya pêro şaredarîyanê Kurdîstanî ser. Qeyûmanê AKPyî şerê taybetî ser o perwerde dî. Hêverî înan dezgehê cinîyan qefilnayî. Dest nîya heqê wekilîtîye yê wekîlanê HDPyî ser û ê tepişîyayî. Wextê îqtîdarê AKPyî de kişîyayîşê cinîyan, îstîsmarê domanan, şîdetê vera cinîyan zêdîyayî. Heman wextî de hêrişê vera Rojawan, Başûr, Vakur, Şingal û Mexmûrî zêdîyayî.

Têgêrayîşê Cinîyan ê Kurdan ê Ewropa Kampanyaya '100 Sebebê Seba Hukmkerdişê Dîktatorî daye destpêkerdene. Na kampanya zaf manadar û ercîyaye ya. Efrîn de cinîyî maruzê tacîz, tecawuz û şîdetî benê. Peymana ke Şingal bêstatu û bêpawitiş verdena hetê Tirkîya-PDK-Iraqî ra ameye îmzakerdene.

Hemleyê 'Faşîzm, Îşxal, Tecrîdî rê Bes o; Wext Wextê Azadîye yo' û 'Vera qirkerdişê cinîyan azadîya cinîyan û komel bipawê' zî zaf girîng ê. Nê hemleyî cewabê hewcedarîyanê ma danê. Serfîrazîya hemleyan reyde wayîrvejîyayîşê Rayberîye, wayîrvejîyayîşê azadîya cinîyan o.

Ma serra 2020î de vera şer, rijnayîş û şîdetê serê cinîyan bêveng nêmendî. Ma îradeyê xokerd xurtêr, xo rêxistin kerd. Têkoşînê cinîyan 2021 de zî do dewam bikero û rayberîya têkoşînê demokrasî û azadîye bikero. Gerîlayê cinîyî yê YJA-Starî û HPGyî bi serkewtişî wezîfeyanê xo anê ca.

Serra 2021î do biba serra kar û têkoşînî. Seba ke ma Rayberîye azad bikerê û faşîzmî ra hesab bipersê ma do çarçewa hemle de têkoşînê xo bi hawayêkê radîkalî bikerê. Ma embazanê xo rê ke grevê vêşanîye de yê selam kenê. Seba pawitişê hemparî, çalakî û rêxistinbîyayîşê cinîyan ma do karê xo bizêdînê.

Waştişo verên ê şarê kurdî yewîya neteweyî ya. Ma do seba naye xo rêxistin bikerê û rayîr nêdê îxanetî. Ma do kiştoxan ra hesab bipersê.

Xoverdayîşê Zeynebe Celalîyana ke Zîndananê Îranî de dewam keno hêz dano cinîyan. Ma do xîret bikerê ke bibê layîqê ci. Ma serra newîye ya têkoşînî de pêro cinîyan û her kesî rê serkewtiş wazenê. Ma venga cinîyan danê le tewrê cepheyê şorişgêrîye bibê, xoverdayîşê xopawitişî de cayê xo bigêrê.''