Partîya Karkeranê Kurdîstanî (PKK) kongreya xo ya ronîyayîşî dewa Fîsî ya qezaya Licê ya Amedî de kerdibî, Kurdîstan û Rojhelatê Mîyanênî de morê xo da binê nêmseserrî. PKKyî kongreya 12ine de zî Herêmanê Pawitişî yê Medya de kerde.

Bi tesîrê atmosferê sîyasî yê serranê 1970an koma wendekaran serkêşîya Rayber Apoyî de ameye têhet û 52 serran morê xo da Tirkîya û Rojhelatê Mîyanênî.

Têgêrayîşê Apoyîyan wextê winayênî de ke nasname, ziwan û kulturê kurdan ameyêne înkarkerdene û îmkaherdene vejîya werte û seke Rayber Apoyî vat ‘’mudaxeleyêko radîkal’’ kerd.

Newroza 1973yî de Awbendê Çubukî yê Anqara de Rayber Apoyî komêka embazan reyde tezê ‘’Kurdîstan kolonyal o’’ pare kerd.

Rayber Apoyî 27ê sibata 2025î de bi ‘’Vengdayîşê Haştîye û Komelê Demokratîkî’’ prosesêko newe yê vurîyayîş û vurnayîşî da destpêkerdene.  Naye ser o kongreya 12ine ameye kerdene.

Heta nika PKKyî nê kongreyî kerdî:

Kongreya ronîyayîşî

26-27ê teşrîna peyêne ya 1978î de, serkêşîya Rayber Apoyî de, dewa Fîsî ya qezaya Licê ya Amedî de ameye kerdene û tede ronîyayîşê PKKyî ame îlankerdene. 22 kesî beşdarê na kongre bîyî. Kongre de bername, tuzuk û manîfestoyê partîye ameyî qebulkerdene. Rayber Apo sey sekreterê partîye ame weçînayene.

Kongreya diyîne: Kongreya destpêkerdişê têkoşînê gerîlayan

Kongreya diyîne 20-25ê tebaxa 1982yî de kampa serê sînorê Sûrîye-Urdunî yê Cepheyê Xelisnayişî yê Şarê Filîstînî de, bi beşdarîya 65 delegeyan ameye kerdene. Tîya de bira ‘’multecîtîye ra xelisîyayîşî, agêrayîşê welatî û dest pêkerdişê têkoşînê gerîlatîye’’ ameye dayene.

Kongreya hîrêyîne: Îlanê ARGKyî

Mabênê 25-30ê gulana 1986î de Kampa Helvî ya Lubnanî de ameye kerdene. Kongreya ke Hemleya 15ê Tebaxe ra dima ameye kerdene tede bire dîyaye ke Artêşa Xelisnayîşê Şarê Kurdî (ARGK) bêra ronayene.

Kongreya Çarine: Kongreya gerîlayan

Mabênê 26-31ê kanûnê 1990î de Heftanîn de ameye kerdene. Seba vilabîyayîşê ARGKyî ra na kongre hetê Rayber Apoyî ra sey ‘kongreya gerîlayan’ ameye namekerdene. Kongre wextê rijîyayîşê sosyalîzmê reelî û Şerê Korfezî de amebî kerdene û o çax Vakurê Kurdîstanî de şer resabi asta tewr berze.

Kongreya pancine: Vurnayîşê rêxistinî

Mabênê 8-27ê çeleyê 1995î de Heftanîn de ameye kerdene. Kongre de herinda sekreterîye de serekîye ronîyaye û vurnayîşê ala partîye reyde warê îdeolojîk û awanîya rêxistinîye de zî vurîyayîşî ameyî kerdene.

Kongreya şeşine: Kongreya prosesê komployî

Mabênê 12ê çeleyî û 18ê sibata 1999î de Xinêr de ameye kerdene. Kongreya 6ine wextê Komployê Mîyanneteweyî yê vera Rayber Apoyî de ameye kerdene.

Kongreya hewtine: Hemleya vurnayîşê paradîgma

2-23yê çeleyê 2000î de Qendîl de, bi beşdarîya 197 delegeyan ameye kerdene û kongre ra dima reya verêne hemleyê serê vurnayîşê paradîgmaya partîye ameyî eştene.

Kongreya heştine: Meseleyê partîye yê zereyî

Bi beşdarîya 285 delegeyan, mabênê 4-10ê nîsane de Qendîl de ameye kerdene. Wextê kongre de meseleyê zereyî û xîretê tasfîyekeran zêdîyabî. Kongre de vurnayîşêko pîl ame kerdene.

Kongreya newine: Kongreya newera awankerdişê PKKyî

Rayber Apoyî vera tayê krîzanê fîkrî û îdeolojîkan ê Partîye prosesê newera awankerdişê PKKyî da destpêkerdene. Kongre mabênê 28ê adare-4ê nîsane de, bi beşdarîya 205 delegeyan û Xinêr de ameye kerdene. 

Kongreya desine: Îdîaya xorinbîyayîşê paradîgma

Mabênê 21-30ê tebaxa 2008î de Qendîl de, ameye kerdene. Kongre de babeta xorinkerdişê parafîgmaya newîye ameye esaskerdene.

Kongreya yewendesine: Prosesê çareserîya demokratîke

Kongreya 11ine mabênê 5-13ê êlula 2013yî de, bi beşdarîya 125 delegeyan Xinêr de ameye kerdene. Wextê kongre de Sûrîye û Iraq sere de Rojhelatê Mîyanênî de şer û Kurdîstan de hêrişê DAÎŞî est bîyê. Kongre de bire dîyaye ke adirbirnayîş bêro îlankerdene û gerîlayî xo Vakurê Kurdîstanî ra biancê. O çax prosesê çareserîye dewam kerdêne. La MGKyê dewleta tirke 30ê teşrîna verêne ya 2014î de Planê Çokdayîşî qebul kerd.

Kongreya 12ine: Kongreya haştîye û awankerdişê komelê demokratîke

Vengdayîşê ‘Haştîye û Komelê Demokratîkî’ yê Rayber Apoyî ser, ameye kerdene. Kongreya 12ine de birê tarîxîyî ameyî girewtene. Kongre de bire dîyaye ke ‘’seba ke prosesê pratîkbîyayîşî hetê Rayber Apoyî ra bêro caardeene û îdarekerdene wa PKK xo fesh bikero, têkoşînê çekdarî biqedîno û xebatê serê PKKyî zî wa biqedê’’ ameye girewtene.