Xeylê bajaranê Vakurê Kurdîstanî û Tirkîya de cinîyî bi wesîleya 8ê Roja Cinîyan ê Kedkaran a Dinya cinîyan aktîvîteyê cîya cîyayî organîze kerdî.

Wan de cinîyî serkêşîya TJA û TUHAY-DERî verê Kampusê Zîndanê Wanî de eşkerayîye ameye dayene. Çalakîye de sloganê “Jin, jiyan, azadî” û “Bijî berxwedana zindanan” ameyî vatene.

Qezaya Geverî ya Colemêrgî de şayîya 8ê Adere ameye organîzekerdene. Cinîyan bi ruhê 8ê Adare îmraliyî selamî şawitî û vat cinîyî çiwat bibê azad û wext komel zî o wext beno azad. Cinîyan vat ê do bi reng, tilîlî û kulturê vejîyê meydanan.

Qezaya Silopî ya Şirnexî de zî cinîyî bi wesîleya Roja Cinîyan ê Kedkaran a Dinya vejîyayî waran. Hemsereka Pêroyî ya DBPyî ke şayîye de qisey kerd, vat: ''Komelo demokratîk yeno manaya komelê ke cinîyî tede azad ê. Azadîya cinîyan mifteyê komelê demokratîkî ya.''

Qezaya Gurne Reşî ya Riha de zî şayîye ameye organîzekerdene. Şayîye de pankartê “Raperîna me li dijî qirkirina jinê ye meşa me ber bi azadîye ve ye” ame daliqnayene. Vervatoxa Meclîsê Dayîkanê Haştîye Havva Kiran veng da dayîkanê leşkeran û vat, ''Bêrê ma pêro pîya semedê haştîye destê yewbînan bigirê.''

Reyna Idîr, Erzirom û Agirî de zî cinîyî bi wesîleya 8ê Adare bi slogana Jin Jiyan Azadîye vejîyayî waran zext û qirkerdişê vera cinîyan şermezar kerdî û mesajê xurtkerdişê têkoşînî da.

Mersin de zî şayîya 8ê Adare ameye kerdene. Aktîvîsta TJA Sebahate Tuncela ke şayîye de qisey kerd , veng da dewlete ke wa frisetê haştîye meremno û vat, ''Eke ma raşta haştîye wazenê ma pêro destê xo kenê binê kerra û haştîye înşa kenê.''