Vervatoxa Meclîsê Cinîyan ê Partîya Çep a Keske Canane Çalagan Merkezê Pêroyî yê HDPyî de kombîyayîşê çapemenîye kerd û rojdem ercna.

Qiseykerdişê Canane Çalagan ra tay noqtayê girîngî wina yê:

''Serrgêra rejîmê ci de kerdişê  qeyûman dewam kenê. Hema zî bi seyan embazê ke herinda înan de qeyûm tayîn bîyê, zîndanan de yê. Qeyûman hêverî cinîyî kerdî hedef û hêrişê destkewteyanê cinîyan kerd. Ma do vera rejîmê qeyûman têkoşîn bikerê û qetî destkewteyanê xo ra fek vera medê. Rejîmê qeyûman ney paradîgmaya ekolojîk, demokratîk û azadîgîra cinîyan do ser bikewa.

 Polîtîkayanê AKP-MHPyî ra krîzo ekonomîk her ke şino beno giranêr. AKP-MHP cinîyan û şaran ra dizneno û xizanîye sey qederî ferz keno.

 Binê nê krîz, şîdet û şerî de polîtîlkayê tecrîdî est ê. Tecrîd Îmraliyî ra vilayê pêro zîndanan beno. Mayê Haştîye û Şemeyî tim benê hedefê hêriş û kerdişanê xiraban. Têkoşînê Mayanê Haştîye û Şemeyî têkoşînê ma yo. Ma do heta peynî têkoşînê înan berz bikerê.  

Cûdî û Bedlîs de binê nameyê asayîşî de şewatî yenê vetene û darî birîyenê. No îqtîdar çi rindîye est a vera ci şer keno. Cinîyî do vera nê sîstemê rantî hînî darêke zî nêdê. 

Dewaya Kunpase ya Kobanê dewam kena. Embazanê ma yê cinîyan salonanaê mehkemeyan de bahaneyê nê dewa pûç kerdî.  Dîyaneyo ke wazeno tewrê dewaya Kobanê bibo sey dozgerî têgêreno. Dîyanet pê nê kerdişê xo dînî îstîsmar keno. Dîyaneto ke verê kerdişanê serê kurdan de vengê xo anêkeno reyna hetê waştoxanê şerî de cayê xo girewto. 

Seke zanîyeno ke ma weçînayîşanê 14ê gulane ra dima kewtî prosesê newe ra awanbîyayîşî. Ma kombîyayîşê cinîyan serûber kerdî, nînan de ercnayîşî û rexneyî kerdî û nîqaşê qîmetînî ardî ziwan. Dima ma di komxebatî kerdî. Ma do 20-30ê tebaxe de pêro şaristanan de kombîyayîşê amadekarîye bikerê û  8-9ê êlule de zî Konferansê Cinîyan bikerê.  Ma do konferansê xo de xeta têkoşînî ya dewrê neweyî dîyar bikerê.''