Vervatoxa Meclîsê Cinîyan ê Partîya Çep a Keske Canane Çalagan pare kerd ke nîqaşanê weçînayîşî ra dima ê do kombîyayîş, pêvînayîş û komxebatanê cinîyan bikerê. Çalagane vat ke ganî têkoşîno hempar û îtîfaqê cinîyan bêrê awankerdene.
Vervatoxa Meclîsê Cinîyan ê Partîya Çep a Keske Canane Çalagan derheqê xebatan û armancanê înan de ANFyî rê qisey kerd.
Çalagane bale ante ser ke Partîya Çep a Keske partîyêka cinîyan a û înan dest pê xebatanê xoseran ê cinîyan kerdo. Çalagane vat: ''Sey partîya cinîyan ma kombîyayîşanê pêroyînan reyde kombîyayîşanê xoseran zî kenê. Ma temmuze de zî wina kerd. Ma do konferans û kongreyanê xo zî bikerê, kargehan û komxebatan bikerê. Komxebatan de ma 'Rayîrê 3. û Cinîyan' û 'meseleyanê rêxistinîye' ser o nîqaşan bikerê. Ma heta nika kombîyayîşanê xo de meseleyê cinîyan ardî ziwan.
Ma warê cuye de mekanîzmayê girîngî awan kerdî ke temsîlîya têdûşte-hemserekîye nimûneyê ney o. Ma do bikerê ke nê mekanîzmayan aver berê û bikerê bingeyê nîqaşanê xo. Heyf ke zemînê têkoşînî yo hempar ê cinîyan hîra nîyo ke cinîyî vera polîtîkayanê îqtîdarî vejîyê. Rixmê ney zî seba yewkerdişê têkoşînî û awankerdişê îtîfaqê cinîyan ma rê meseleyê girîng ê. Ma do îtîfaqê cinîyan û têkoşînê cinîyan ê hemparî qetî awan bikerê.''
Vervatoxa Meclîsê Cinîyan ê Partîya Çep a Keske Canane Çalagan da zanayene ke cinîyî do vera tecrîdî û polîtîkayanê şerê taybetî zî xebatan bikerê. Çalagane vat: ''Bi hişmendî û îradeyê xo ma do xerîtaya xo ya têkoşînî eşkera bikerê.''
