Vervatoxa Meclîsê Cinîyan ê Partîya Çep a Keske Canane Çaglayan Merkezê Pêroyî Yê HDPyî de kombîyayîşê çapemenîye kerd û derheqê rojedemê cinîyan de qisey kerd.

Çaglayane vat, "Ma maratono derg ê vîjnayîşî xo dima verda. Nê prosesî de sere de cinîyî şarê ma zaf xebitya, kede daye. Ez tîya hêna  spas kena. Xora têkoşînê ma cinîyan bi vîjnayîşî sînordar nîyo. Ewro vera nê îqtîdarî ma do paştdayîş û xoverdayîşê cinîyan xurtêr bikerê. Nê welatî de ke ma tim pê polîtîkayanê şîdet, hêriş, krîzê ekonomîkî, vêşanîye û şerî benê hîşar, ma sey cinîyan vînenê ke xoverdayîşê ma senî muhîm o.  Badê xesbkerdişê Pêkerdişê Îstanbulî tewr tay 642 di cinîyê hetê camêrdan ra ameyî kiştene.  373 cinîyan zî bi hewayêkê şikdarî dinayaya xo bedilnaye. Eşkera yeno vînayene ke hukmat herinda vergirewtişê şîdetê vera cinîyan de dahîna rayîrê ci akeno.

Tirkîya de zaf krîzî est ê. Sebebanê nînan ra yew zî bêşik çaresernêkerdişê meseleya kurdan a. Reyna polîtîkayê şer û tecrîdê Îmraliyî sebebê nê krîzan ê. Rîyê polîtîkaya înkarî ya îqtîdarê AKPyî ra sere de cinîyî heme komel binê tecrîdî de yo.  Binpaykerdişê heqanê zîndanan, qedexeyê vera çalakîyanê demokratîkan ê şarî nê pêro pabesteyê polîtîkayanê tecrîdî yê.  Gerek nê heme qedexe û zextê biqedîyê û tecrîdê serê Birêz Ocalanî bêro wedaritene.

Mayê Şemeyî de semedê musayîşê aqibetê merdimanê xo Meydanê Galatasarayî de yenê têhet tim raştê hêrişê polîsan yenê. Na bêhuqûqîye ya. Heqê çalakîye yê şarî yeno xespkerdene.  Ma xoverdayîşê Mayan/Merdimanê Şemeyî  silam kenê ke rixmê hêrişan verê xo danê meydanê çalakîye. Ma hêna vanê têkoşînê Mayanê Şemeyî têkoşînê ma yo. Rojdemêkê ma yo bîn zî Dewaya Kobanê ya. Ma tîya ra Gultane Kişanak, Figene Yuksekdag, Ayla Akat Ata, Sebahat Tuncel û heme embazanê xo yê bînan rê silam kenê.

Inkey wextê pîlkerdişê têkoşînî yo. Ma sey Meclîsê Cinîyan ê Partîya Çep a Keske do nê di aşmanê verê ma de têhetameyîşê cinîyan organîze bikerê. Ma do bi rexne û fikranê cinîyan rayîrê xo  rê dewam bikerê. Înanê ke çim verdayo destekewteyanê ma, wazenê ma bêhevî bikerê, heqê ma xesp kerdî wa bizanê ke ma sey vîzrî ma ewro zî est ê, ma do tim bibê!"