Çewlîg de bi wesîleya 8’ê Adare cinîyî banê HDP’yî de ameyî pêser û derheqê xoverdayîşê cinîyan  de sînevîzyonêk sery kerd.

Aktîvîteya ke xeylî cinîyî tewrê ci bîyî de namzeda hemserekîye ya şaredarîye ya Çewlîgî Semen Çakase qisey kerd. Çakase bale ante xoverdayîşê Leyla Guvene ser, roja heme xoverdayoxan pîroz kerd û va:‘‘ Ma cinîyan ê xoverdayoxan rê zaf çîyî deyndarê û ganî ma  rêça înan de bi girkerdişê xoverdayîşî wezîfeyê xo bica bîyarê. Eke ma xo ra bawer bikê ma eşkenê herçî bikerê. Ma cinî ganî yew bî, hêzê xo yew bikê mucadeleyî gird bikê û wayîr heqanê xo bivejê. Ma bi bawerîye û qerardarîya pîle kewtê nê rayîrî. Ma do bi xoverdayîşê hemparî ser bikewê. Xoverdayîşê cinîyan do ser bikewo.''

Cinîyan bado zî bi parlameterê HDP’yî Erdal Aydemîr û namzedê serekîye ya şaredarîya Çewlîgî Hîşyar Ozsoyî  Kuçeyê Gençî de  cinîyan rê vilîkî vila kerdî.