Fermandara Qerargehê Merkezî ya YJA-Starî Zozane Çewlik têkoşînê 2019î û hedef û armancê 2020î seba ANF ercnayî.

Ercnayîşê Fermandara Qerargehê Merkezî ya YJA-Starî Zozane Çewlik wina yê: ''Ez verê cû pêro şehîdanê ma bi mînet û rêzdarî yad kena û verê keda înan de sereyê xo ana war. Nê prosesê nikayênî de hêriş û qirkerdişê vera şarê ma bîyî zêdêr. Dişmenî bi barbarîya xo asta zîhnîyetê xo yê faşîzan mojnenê ra. Prosesê çinkerdiş û şerê vera kurdan bi îşxalê Rojawanî dewam keno. Dewleta tirke seke yeno zanayene 9ê teşrîna verêne de roja komloyê mîyanneteteweyî de vera Şorişê Rojawanî îşxalêk da destpêkerdene. Dewlete bi nê hawayî hem Rojawan ra qesasê xo gêna hem zî plananê xo yê çinkerdişê kurdan dewam kena.

Xoverdayîşê Rojawanî yê vera nê îşxalî zî bi heman hawayî dewam keno. Wina yeno aseno ke no îşxal rojanê ke verê ma de yê do hîna bibo xurt û pîl. Seba nê îşxalî ganî ma amadekarîya xo bikê û xoverdayîşê xo bikê xurtêr.îşxalê Rojawanî kesêk şaş nêkerd. Bi îşxalê Rojawanî yo ke 9ê de dest pêkerd hedefê dewleta tirke çinkerdişê Têgêrayîşê Azadîye yê Kurdîstanî û Rayberîye yê.

La hînî şertê serranê 90an vîyartî. Kurdî sey verî nîyê. Paradîgmaya konfederalîzmê demokratîkî û neteweyê demokratîkî yê Rayber Apoyî bingeyê nê vurnayîşî yo. Na paradîgma bi têgêrayîşê cinîyan pratîze bîye. Na paradîgma pêro neteweyanê dinya ser o tesîr kerd ke hêzê mîyanneteweyî zî aslê xo de naye ra tersenê. Coka wazenê ke no sîstem bêro çinkerdene. Mesele îdeolojîk û sîstematîk a. Kurdî û destkewteyê kurdan hînî sînorê welatî ra derbaz bîyî û rojdemê dinya de yê. Nê destkewteyî cinîyan û şaranê bînan ê dinya ser o zî tesîr kenê û kenê ke nê zî têbigêrê.

Hêrişî do dewam bikê. La bêguman nê hêrişî têna zehmetîye nêdê kurdan. Xoverdayîşê ma hêvî dano şaranê dinya û rayberîya xoverdayîşan ê bînan keno. Coka dewleta tirke û hêzê emperyalî zî hîna asan hêrişê ma nêkê. Vera îşxalê Rojawanî zaf nêrazîbîyayîşî ameyî mojnayene la reyna zî dewam keno. Çunke bingeyê nê îşxalî de tersêko pîl esto. Xoverdayîşê kurdan zî do ameyoxê tarîxî eşkera biko. Netîceyê nê xoverdayîşî do tesîrê dinya bikê.

Aslêr xo de wexto ke şer bibo xorin çend ke rîskî bibê zêde destkewteyî zî hende benê zêde. Eke kurdî, şarê kurdîstanijî, cinîyî û hêzê demokrasîyî bi bawerîya serkewtişî xoverdayîşê xo dewam bikê îqtîdarê AKPyî yo ke rayberîya dewleta tirke ya faşîste keno çin bikê. Her kes zaneno ke hêzê mîyanneteweyî AKP xebitnenê la AKP pê na rewşe qayîl a. Çunke seke her kes pê hesîya ke nê operasyonê sîyasî û îşxalî pêro planê xo xelisnayîşî yê erdoganî yê.

Ma serra 2019î de hem zereyê welatî de hem zî teberê welatî de hetê sîyasî û leşkerî ra tesbîtê girîngî kerdî. Ma bi hedefanê vurnayîşan ê xorinan dekewte serra newîye. Destpêkê 2019î de ma bi grevê vêşanîye yê Leyla Guven û tepişteyan xoverdayîşêko pîl mojna. Nê grevê vêşanîye ra dima Rayberê ma reyde pêvînayîşî ameyî kerdene û no moral û hêzêkê pîlî da şarê ma û têgêrayîşê ma. Netîceyanê weçînayîşanê herêmîyan ê Tirkîya de zî ma serkewtişê xo dibare kerd û destkewteyê pîlî yê sîyasî vistî xo destî.

Her çiqas vera hêzanê ma yê HPG û YJA-Starî planê çinkerdişî ameyî kerdene zî hêzanê ma xoverdayîş û tekoşînêko pîl mojna ra. Dişmenî za operasyonî kerdî la netîceyêk zî nêgirewt. Artêşa tirke ya îşxalkere bi şerê psîkolojîkî û metodanê taybetan ê şerî kena ke şer manîpule bika. Labelê artêşa îşxalkere operasyonanê xo yê Herêmanê Pawitişî yê Medya de qet aver nêşîye. Bi taktîkanê gerîlayan ê neweyan ma derbeyê pîlî dayî dişmenan ro. Na çerçewe de ma sere de Cilo, Avaşîn, Zap, Xakurkê, Botan û Serhed de herême de vera dişmenan çalakîyê sabotajî û suîkastî yê bitesîrî kerdî. Gerîlayanê YJA-Starî vera operasyonanê dişemanan her ca de xoverdayîş û fedakarîyêka pîle kerde. Gerîlayanê ma yê cinîyan hem Vakur de hem zî Başûr de bi performansê bêhempa xîretê dişmenan çin kerdî.

Na çarçewe de bîlançoyê ma yo 2019î wina yo:

Çalakîyê YJA-Starî:58

Şehîdê ma yê cinîyî:166

Esîrî: 3

Dişmenî hêrişê xo yê Rojawan, Vakur û Başûrê Kurdîstanî bêmabên dewam kenê. Ganî ma nê prosesî bi hawayêkê raştî biercnê û bi taktîk û metodanê raştan têkoşînê ma biko ke ma serkewteyê nê prosesî bibê. Ez pê bawer a ke ma do nê prosesî raşt biercnê û gerîlayan û şar reyde xoverdayîşê xo pîl bikê û ser bikewê. Ez selam dana pêro cinîyanê xoverdayoxan û hêzanê demokratîkan ê ke ma do pîya têkoşînê xo xurt bikê û qirkerdişan çin bikê. Hedefê ma yê tewr pîlî yê 2020î newe ra rêxistinkerdişê HPG û YJA-Starî û şiktişê serê tecrîdê Rayber Apoyî yo."