Endama Koordînasyonê  KJK'yî Bese Erzîncane  bi wesîleya 8’ê Adare xoverdayîşê cinîyan Kurdan ercna. Erzîncanê sereyê qiseykerdişê xo de 8’ê Adare yê heme cinîyan pîroz kerd û vat, “Ma sey Cinîyê Kurdî  bi hêzê xo yo ke ma şehîdan û tarîxê xo ra girewto, çalakîyanê tekoşînî rê rayberîye kenê. Ma hêz danê merdimîye û hêz gênê.’’

HER 8’Ê ADARE MA VÎNENÊ KE XETA MA YA AZADÎYA CINÎYAN GIRD BENA, HÎRA BENA

Bese Erzîncane ard ziwan ke, têkoşînê azadîye yê cinîyan serdemêko krîtîk û stratejîk de yo û vat, “Emser çalakîyanê 8'ê Adare rê tewrbîyayîşêko xurt bi. Hem dinya, hem zî Kurdistan de cinî heme wareyê mîtîngan, kuçeyan de bîyî. Bi hişmendî û berpirsîyarîyêka girde ya azadîye 8'ê Adare ra wayîr vejîyayî. Coka zî çalakîyê ke Adare de ameyî viraştene, qerardarîya cinîyan a seba cuya azade bi rengêkê akerde vetê werte.”

Erzîncane bale ante serê xeta azadîye ya cinîyan ê Kurdan a ke têkoşînê azadîye yê Rayberê Şarê Kurdî Abdullah Ocalanî reyde roje bi roje aver de şina û xurt bena û vat, “Wexto ke merdim bala xo bido serê çalakîyan ê 8'ê Adare yê serranê verî ra nata yenê kerdene, vîneno ke têkoşînê ma yê azadîye yê cinîyan gird beno û global beno. Slogana ma “Cinî, cuye, azadîye” global bîye. Ma 8'ê Adare yê emserrî de zi dî ke îdîa û qerardarîya cinîyan a seba azadîye roje bi roje zêde bîya.”

ÇALAKWANANÊ GREVÊ VÊŞANÎYE SEBA AZADÎYA MERDIMÎYE XO VER RO DANÊ

Dewamê qiseykerdişê xo de Erzîncane bale ante serê xoverdayîşê grevê vêşanîye yê vera tecrîdkerişê Ocalanî û şexsê hemsereka KCD’yî û parlamentera HDP'yî ya Colemêrgî Leyla Guvene de heme xoverdayoxê grevê vêşanîye silam kerdî û vat: “Bi serkêşîya Birêze Leyla Guvene ma merheleyêka muhîm a tarîxê cinîyan de yê. Na çalakîye teyna seba Kurdan û cinîyan nîya, seba merdimîye zî çalakîyêka wijdanî, exlaqî û huquqî ya. Şexsê Leyla Guvene de heme çalakwanê grevê vêşanîye teyna seba wedaritişê tecrîdkerdişê Rayberîye nê, eynî wext de seba azadîya cinîyan û merdimîye têkoşîn kenê. Şexsê Ocalanî de îşkence, zext û tecrîd heme hêzanê azadîye û merdimîye rê yenê ferzkerdene. Şexsê Rayberî de wazenê alternatîfê merdimîyî yê vera dewlete û serdestîye tecrîd bikerê û mîyan ra wedarê. Tecrîdkerişê Rayberê ma û sîstemê îşkenceyî yo vera ey nêno qebûlkerdene. Cuya alternatîfe sere de Rojawanî yê Kurdistanî de û hemeyê dinya de vila bena. Coka 8’ê Adare bî prosesêko çalakîyan ê ke azadîya Rayberê ma kewta rojdem. Rewşa Rayberê ma bi wesîleyê 8’ê Adare sey persêka globale kewte rojdem. Manaya şîyarê ma yê “Azadîya Rayberê ma azadîya cinîyan a” roje bi roje zêdetir bana.’’

HEMBERÊ PORDERGAN DE ERDÎŞDERGÎ BIN KEWTÎ

Endama Koordînasyonê KJK'yî Bese Erzîncane  serkewtişê Hemleya Dêrazorî dard vîrî û va “Dêrazorî de bi operasyonê peyênî yê hêzanê QSD, YPG û YPJ'yî  DAÎŞ sînorê qedîyayîşî de yo. Nê bingeyî ser o, nê rojanê 8'ê Adare de xoverdayîşê şaran bi serkêşîya cinîyan ser keweno. Xoverdayîşê cinîyan ê Rojawanî sewîyeya qeremanîye û serkewtişê YPJ'yî yê pawtişê cinîyan û welatî nîşan dano. Rayapêroyî ya dinya êdî qebûl kena ke Şorişê Rojawanî şorişêkê cinîya o. Nika bi rengêkê akerde yeno vatêne, ‘Hemberê pordergan de erdîşdergî bin kewtî’.

DAÎŞ HÎNA EFRÎN, ÎDLÎB Û CERABLÛS DE ESTO

Şorişo ke Rojawanê de yeno kerdene, tarîxê şorişê cinîyan o û eşkeno heme Rojkewtena Mîyanêne û dinya rê bibo nimûneyêk. Hemleya Dêrazorî-Baxozî azadîya cinîyan, cuya azade, dostanî û waye û biratîya şaran temsîl kena. Kurdan, cinîyan têkoşînê vera DAÎŞ’î de reyna îdîa û qerardarîya xo ya cuya azade na herême de ramojna. Cinîyan, Kurdan, şaranê herême ramotê dinya da ke heqê înan serê nê erdî de bi rengêkê azadî esto û biciwîyê. Bêguman ganî no zî bêro vatene û nêro vîrkerdene; Dêrazorî seba qedîyayîşê fîzîkî û sembolî yê dewleta DAÎŞ'î muhîm o. DAÎŞ Dêrazorî de ame qedênayene. Labelê hîna Efrîn, Îdlîb û Cerablûs de esto. Dewleta AKP-MHP'yî rîyê xo yo rastikên Efrîn de her roje nîşan dana. Wexto ke DAÎŞ Efrîn de ame qedênayene, key ke dewleta Tirkî Efrîn ra ameye vetene, o wext merdim eşkeno vajo ke DAÎŞ zî qedîyeno.”