Ronayoxanê PKKyî ra Sakîne Cansiz, temsîlkara KNKyî ya Parisî Fîdane Dogan û endama Têgêrayîşê Ciwanan Leyla Şaylemez ê ke Paris de ameyî qetilkerdene bi kombîyayîşêk ameyî yadkerdene.

Yadkerdişî hetê YJA ra dewa Araksê ya pabesteyê Oktoberyanî de bi deqayêkê rêzgirewtişî dest pêkerd. Kombîyayîş de sîyasetmedar Medya Cûdî qisey kerd. Cûdî derheqê têkoşîn û cuya Sakîne Cansize de wina vat: "Embaze Sakîne domanêka keyeyêko ke Terteleyê Dêrsimî ra xelisîya bîye. Teqîbkerdoxa xobîyayîşê xozayî yê cinîyanê Dêrsimî ra bîye û rayberanê ma ra yew bîye. Embaze Sakîne cuya xo seba azadîye dabî. Rayberêka şorişgêre bîye ke pêro cinîyan ci ra hes kerdêne. Dişmenan bi qetilkerdişê Sakîne waşt ke xeta azadîya cinîye çin bikê. Waşt ke komloyê mîyanneteweyî bidê dewamkerdene. Labelê dewleta tirke û MÎT û pêro hêzê komplogîrî do baş bizanê ke ser nêkewtî."

Hemsereka Komîteya Kurdîstanî Îla Tovmasan, Dayîka şehîdî û endama Yewîya Cinîyan ê Azadan a Armenîstanî Kubera Kalaşyan û hemwelatîyê bi nameyê Remo Temoyanî zî merasîmê yadkerdişî de qisey kerd û îfade kerd ke caardişê yewîya kurdan seba caardişê xeyalanê şehîdan ê bêmergan zaf girîng o.

Merasîmê yadkerdişî bi slogananê ''Şehîdî nêmirenî'' û ''Cinîye, Cuye, Azadîye'' qedîya.