Cinîya kurde Jîna Emînî 13ê êlula 2022yî de seba ke gijikê ci asayêne hetê polîsanê exlaqî yê dewleta Îranî ra amebî destbendkerdene û 16ê êlule de zî îşkenceyan ra dinyaya xo bedilnabî. 

Birayê Jîna Emînî Kîarash Emînîyî pare kerd ke wexto ke verê qereqolî de o pabeyê waya xo bîyo polîsan pê gazê îsotî hêrişê înan kerdo. Emînîyî vat: ''Şewe her cinîya ke qereqolî ra vejîyayêne vatêne 'yewe kişîyaye.' Mi fotografê Jîna mojna înan û înan vat ke Jîna kişîyaya. Jîna verê qereqolî ra pê ambulansî ameye berdene bi nêweşxaneyî. Nêweşxaneyê Kasra de ame îdîakerdene ke Jîna de meseleya qelbî est a. La mi bi çimanê xo dî ke rî, ling û bedenê aye reş bîyê.''

Jîna Emînî 13ê êlule ra heta 16ê êlule 3 rojan koma de mende. Qereqolî îdîa kerd ke wextê destbendkerdişî de Jîna Emînî krîzê qelbî vîyarta la şahîdan û belgeyan da zanayene ke a netîceya îşkenceyî de kewta koma. Keyeyê Jîna Emînî zî pare kerd ke kênaya înan de nêweşîya qelbî tewr çin bîye.

Dima ke Jîna Emînî dinyaya xo bedilnaye çalakîya verêne şaristanê Seqizî yê Rojhelatê Kurdîstanî de ameye kerdene. 

PJAK û KODARî vera qetilkerdişê Jîna Emînî veng da û naye ser o şarê Seqiz, Sine, Şîno, Bûkan û Bane  19ê êlule de bi şîarê 'Jin, Jiyan, Azadî' grevo pêroyî kerd. 

Goreyê xebera Le Monde çalakîyanê 6 rojanê verênan de 17 kesan dinyaya xo bedilnaye. Selahîyetdaranê Îranî dîyar kerd ke 6 rojan de çalakîker û polîsî zî tede 17 kesan dinyaya xo bedilnaya. 22yê êlule de Îran û Rojhelatê Kurdîstanî de Instagram û Whatsapp ameyî astengkerdene.

Rêxistina Heqanê Merdiman a Îranî (ÎHR) zî da zanayene ke tewr tay 31 sivîlî hetê hêzanê asayîşî ra ameyê kiştene.

Çalakîyanê şermezarkerdişî de mengêke de cinîyan fotografê Ayetullah Hamaneyî bi sloganê 'Dîktatorî rê merg' vêşnayî, laçikê xo eştî û qanûnê seregirewtişî şermezar kerd. 

Ajansê Xeberan ê Aktîvîstanê Heqanê Merdiman (HRANA) pê hesna ke serewedaritişê Îran û Rojhelatê Kurdîstanî de heta 15ê çeleyê 2023yî 71ê ci domanî 524 kesî ameyê qetilkerdene, 19 hezar û 401 kesî ameyî destbendkerdene û tepiştene.

Mehkemeyanê Îranî 724 kesan rê beşdarîya çalakîyan rê cezaya zîndanî daye. Goreyê HRANA 17ê êlule ra heta 7ê kanûna 2022yî 82 rojan, 31 wîlayetan, 160 şaristanan û 143 zanîngehan de çalakîyî ameyî kerdene.